新車速報：
豐田Soarer玩升級 凝聚誘人魅力
早前，日本豐田車廠推出全新Soarer車系（即港版凌志SC430），備受本土及歐美市場追捧，皆因佢有轎跑車嘅作風之餘，重好有一分大車嘅貴氣感；然而，賣相卻予人有過於柔弱之感。為此，最近就有車行引入2002年新版Soarer，全車加有大包圍及Racing避震外，重添上一套美國MarkLevinson高級音響連DVD組合，給Soarer倍添跑意之餘，重好講究享受㗎！
記者、攝影：陳偉林
全車包圍 改變形象
新車一改過往柔弱嘅一面，事關呢部2002年新版豐田Soarer，加有一套全車大包圍，令賣相變得剛勁富吸引力之餘，四輪懸掛重改換上Racing組合，令車身調低咗25mm，倍見穩定感之餘，重有助彎路嘅循迹表現㗎！因而令呢部Soarer轎跑車，有較確切嘅跑車味。
講享受惟我獨尊
嘩！真係唔講得笑，新加入嘅一套MarkLevinson音響，匹配前後八個揚聲器及超低音炮，除音色突出外，佢嗰套電子自動音場調節裝置，重可以因應部車開關篷頂而改變，令音色圓渾而無礙乘客嘅享受㗎！再者，重加入有一套DVD影音裝備，大可忙裏偷閒，打開篷頂欣賞悅耳嘅MusicVideo，齊享雙料娛樂㖭！
動靜皆宜兩面睇
呢部Soarer之所以咁受車迷歡迎，另一個原因會係佢嘅電摺硬頂配搭，事關收起篷頂會係一部不折不扣嘅開篷跑車外，你只要按動電掣不消半分鐘，拉起硬頂嘅Soarer，便會搖身一變成為一部硬頂轎跑車，更能迎合不同人士嘅喜好嘛！
而車廂豪邁嘅修飾，加上一應俱全嘅設備，重有主動式嘅VSC及TRC裝置，以及被動式嘅四個安全氣袋連ABS+EBD組合，真係相得益彰㗎！
記者試後簡評 優點 外形： 加有全車大包圍更添辣味外，重能夠凸顯其個性。 車廂： 高級皮椅烘托出至正乘坐感，豪情洋溢。 設備： 當中至出位係一套可自動調校音場嘅MarkLevinson汽車音響組合，享受至高。 操控： 改換上Racing避震彈弓有出眾嘅穩定性外，重將車身Low低咗25mm㖭。 缺點 1. 偏重豪華轎車享受，稍欠一分剛勁嘅咆哮聲響。 2. 僅配一套5前速自動波箱，獨欠加速嘅爆炸感。