求驗客手記:費高!又扭軚 - 求驗客

蘋果日報 2007/06/12 00:00


「萬人迷」碧咸同前皇馬隊友費高真係兩種性格,前者話一就一,後者就鍾意轉𠝹。日前,碧咸就拒絕皇馬要佢唔好去洛杉磯銀河嘅請求,費高就決定繼續留番喺國米。
皇馬會長卡達朗周一話碧咸同銀河份約有取消條款,仲大口氣叫銀河隊開個價出嚟,總之希望碧咸留番喺皇馬。不過,碧咸即刻透過發言人講明:「無意取消合約,十分期待去洛杉磯。」
碧咸守信好多
洛杉磯銀河會長拉拿斯其間有句說話最經典:「唔好意思,隻船已經開走咗喇!」呢句說話費高都啱聽,事關呢位前皇馬6條煙,1月幾經反口,終簽約7月加盟沙地球會,點知周一又決定留番喺國米,下季掛靴後任球會公關。
我求大俠覺得,簽約之前轉𠝹無可厚非,畢竟人人都爭取最優厚條件;不過畫咗隻龜仲反口就唔多啱喇!所以,雖然求大俠欣賞費高球技多於碧咸,但遵守承諾呢點碧咸就高幾班喇!
反口覆舌早有前科
費高轉𠝹其實早有前科,當年佢喺士砵亭剛成名,經理人就分別同帕爾馬、祖雲達斯簽約,結果兩份合約都被判無效之餘,仲搞到被禁止兩年內轉會意甲。而當時費高都只係23歲啫!
到00年,27歲嘅費高轉會皇馬之後重返魯營球場,被巴塞球迷掟過豬頭後,我求大俠以為佢會改過,點知𠵱家又反口留效國米。費高,我求大俠係你球迷,都開始有啲反感喇!
empty