Money Walker:MPF中逆市奇葩 - El.

蘋果日報 2016/02/26 00:00


環球股市近月chok到暈,MPF表現慘烈係意料中事,不過想賺錢其實都唔係冇可能。根據晨星資料,中港MPF股票基金年初至今全線要蝕,而且蝕得相當甘。蝕最少嘅港股基金係永明首域強積金香港股票基金,但都要蝕一成。至於中國及大中華股票類別入面,表現最好嘅基金係東亞大中華股票基金,蝕9.02%。
中港MPF股票基金做得差唔係新鮮事,跌市時表現差就預咗,咁歐、美、日股MPF基金會唔會好啲?答案係相對蝕少啲,但唔少都蝕半成以上。不過筆者喺芸芸MPF基金入面卻搵到一類逆市奇萉,就係債券基金。
債券基金主要細分三類,分別係環球債券基金、港元債券基金同亞洲債券基金,當中以環球債券基金今年做得最靚,唔少年初至今都錄得3%回報。雖然有部份環球債券基金輸錢,但全部暫時都唔蝕多過1%,仍然跑贏股票基金,估計係同美國有機會暫緩加息,同埋歐洲央行買債有關。
港元債券基金回報雖然唔及環球債券基金,不過年初至今全部都唔使蝕,回報介乎0.22%至0.97%,喺呢個時勢已算相當唔錯,而且呢類基金好在唔涉及滙兌風險。至於亞洲債券基金,全線有大約1%回報,值得拍手。
MPF係長線,所以筆者認為唔需要因為跌市而急急沽晒股票基金。不過嚟緊幾個月,相信環球股市繼續波動,加上美國中期有機會宣佈唔加息甚或調頭減息,所以債券表現如無意外應該會做得好過股票。筆者建議大家在MPF新供款中,增加買入債券基金嘅比重。

El.
本欄逢周二、五刊出
empty