青政游蕙禎因宣誓案被DQ後，九龍西遲啲有補選，民協出戰應該有機啩，而今年29歲、上年曾經出戰超級區議會嘅民協何啟明，已經報名參加黨內初選同馮檢基爭出線。佢自爆話媽媽喺佢細個時發現佢有做反對派嘅基因，因為佢細細個時睇電視，每次睇到有示威抗議場面，就同妹妹有樣學樣，「喺到學人哋舉晒手，嗌『抗議、抗議』等口號」。
𠵱家係深水埗區議員嘅何啟明細個住荃灣，雖則大個咗家住將軍澳，但佢自言同九西淵緣甚深，皆因婆婆住喺深水埗，由細到大都喺呢區流連，地道小食更如數家珍，「好似公和（荳品廠）嘅煎釀豆卜豆腐，細細個成日都食」。

同阿妹鬧交練辯才

何啟明細個眼仔睩睩好趣致，佢話細個都幾奀皮，成日同妹妹鬧交，可能因為咁練好咗口才，𠵱家做議員同人辯論都冇難度。佢話讀中學時好留意時事，但對參政冇概念，當時只係幫過書友仔助選學生會。佢自言係唔起眼嘅學生，成績都麻麻，公開試失手，升大學無望就轉攻理大副學士再升大學。畢業第一份工就喺民協做地區事務，2015年27歲當上區議員。