曼城中場祖爾巴頓一向都有「暴力王」之稱，佢曾經用過煙頭「辣」自己青年軍球員隻眼，俾球會罰過之後，仍然死性不改，日前喺操練中又同隊友達保開拖，搞到𠵱家終於俾會方罰無限期停賽，今季肯定唔會再獲上陣機會。如果係真，下場聯賽迎戰曼聯，咁咪又益咗「紅魔」？

祖爾巴頓勢離曼城

祖爾巴頓躁底，但我求大俠就唔係好驚佢冇球會落班囉。曼城唔用佢，季尾都有大把球會爭住簽佢，好似愛華頓就想用550萬鎊（約8,570萬港元）簽佢返嚟。
祖爾巴頓嘅經理人就話：「我唔知祖爾下季仲喺唔喺曼城，不過咪由得球會安排囉；以佢嘅天份同表現，轉會市場肯定唔會冇人吼。」言下之意，即係毫無悔改心啦？
冇咗祖爾巴頓，對於佢哋嚟緊周六聯賽迎戰嘅對手曼聯，可以講係重大喜訊。事關曼聯一世夠運，今季更加係行運一條龍，聯賽領先「車仔」5分，足總盃又入咗決賽。周六作客曼城，對手冇咗件中場硬漢壓陣，曼聯踢起上嚟都得手應心啲啦。