數碼達人：
搶試《WE2008》易容上陣自己組隊

蘋果日報 2007/10/27 00:00

世界盃、歐國盃要兩年先嚟一劑，鍾意睇波嘅朋友惟有靠英超歐聯止咳，好彩《WinningEleven》夠晒好玩，隨時可以整番一兩場友誼波一解愁悶。只可惜咁耐以嚟，PS2香港官方唔肯支援Online，下下要就啱成村人夾埋時間開波都幾冇癮。如今系列最新作《WE2008》唔單止任你免費連線對戰，仲出埋畫面最正嘅PS3同XBOX360。

文：陳福榮
鳴謝：龍勇香港實業公司、Konami
自己做球星落場
唔係話360出得唔好，但有唔少歐洲機迷都投訴今次PS3版窒得嚴重過360，可能係內部處理瓶頸所致。但無論如何，只要你擁有PSEye就可以Scan自己個樣入去，當自己係球員落場過吓癮，尤其同相熟朋友互挑就更為正斗！至於360方面，則可借助舊年推出嗰隻WebCam嚟玩。
話晒係次世代機種，如果PS3同360只有畫面靚咗咁似乎好失敗，其實開發人員有畀心機去用盡兩者嘅演算性能，因此佢哋可以做到多過PS2版約50%動作，例如插水博罰球同某啲新追加盤扭絕技，就係PS2所欠奉。另外電腦AI若被玩家愚弄後亦會學到嘢，唔會俾你永遠用同一招屈佢機，唔通正如聖鬥士嘅金句「同樣嘅招數係唔會中你兩次」咁款？
empty
■借助剛推出嘅PSEye，PS3版可將閣下尊容放入隻Game度。
empty
■唔知有冇人可以好似呢條金毛仔咁靚仔呢？
empty
■插水係今集新加蠱惑動作，只限兩個次世代版本先有。
empty
■「車仔魔獸」杜奧巴呢期人氣爆炸，連科特廸瓦都因此而受惠。
empty
■PS3同360都好重視場內外各種演出畫面。
empty
■贏到超級獎盃，梗要懶巴閉攞嚟威威啦！
PS2模式多最暢順
講得多PS3同360嘅優點，或者有人會問Konami仲出PS2版嚟托咩?!始終佢係全球滲透率最高，用戶一定遍佈各階層，呢個龐大市場絕對唔可以忽視。唔知係咪嗰兩個版本畫面太過高清，往往開角球、入咗波甚至列隊進場時都會窒機，俾人戲謔「咁大個球場都容納唔到16個識郁嘅人」，反而相對起嚟溶溶爛爛嘅PS2就完全冇呢個問題，抵讚到極點！模式方面佢亦係三者之冠，依照《J-LeagueWE2007》嚟開發嘅今集有齊之前所有模式，例如必須按照指定條件嚟贏波嘅WorldTour等。此外，佢仲對應預定明年1月發售嘅PSP版，據講雙方到時可作球員資料嘅互換通訊喎。
empty
■PS3及360版喺比賽途中按暫停，會出現場邊教練團嘅樣子。
empty
■連酒吧睇直播都係實時運算，主機性能未免強勁到有點多餘。
免費Online　任搵對手
為咗令傳媒同Game舖盡早知道今集《WE2008》有咩非玩不可嘅賣點，香港Konami喺佢哋位於西九龍中心嘅Showroom搞咗個試玩會，分別展出PS3、XBOX360同PS2三個不同版本。由於前兩者係同TGS嗰陣一樣、只有6支國家隊揀到嚟玩嘅較早期版本，反而PS2則是乜Mode都試到嘅100%完成品，因此次世代機種大家嘅着眼點就變成盤球順唔順、讀碟快唔快、畫面係咪好靚咁。
根據官方資料，每個版本都會採用全英文顯示嘅行版《WE2008》，原則上係免費任玩家上網搵人挑機，之不過PS2想連線玩又難又煩，基本上只需集中喺PS3同360嗰度，反正全部都係清一色連去日本伺服器。PS3嘅做法同九成九遊戲一樣，駁晒線連得上PSNetwork就可以開波，一毫子都唔使畀；至於360閣下則必須為金會員先可以玩到，但勝在唔會按局按月收費。計埋咁多年嘅按鍵習慣因素，兩部機都冇嘅人若想趁今次出機，PS3版可能比較適合大家所需。
empty
■幾十人堆喺西九龍Showroom，都係為咗一睹佢嘅真貌咋。
球迷勁讚

余先生
Game舖負責人
「兩個版本我都試過，畫面無疑靚過以前好多，整體都夠流暢。另外有代理令到唔使擔心貨源問題，而且佢轉晒做英文介面絕對係好事，始終唔少客人都想睇得明班球星名，咁就連抄Save都慳番。」
empty
淙流
Crossmedia高層
「手感方面360同之前《WEX》差唔多，PS3則跟PS2分別不大，但論Game本身明顯似《WEX》多啲。同《FIFA》相比，遊戲性拋離一條街。」
empty
Sunny
逾十年《WE》Fans
「電腦AI比上集聰明得多，防守、盤扭及進攻意識都好醒，不過埋門一腳硬係屎到痹。畫面係預期之內咁好，但拍落《FIFA》就無甜頭，係球員嘅面相好啲。不過PS3個Replay都幾窒！」
empty
機種：XBOX360、PS3、PS2
廠商：Konami
類型：SOC
人數：1-6人（網上對戰2-4人）
日期：11月22日
售價：$419（XBOX360）$448（PS3）$388（PS2）