搞3G究竟搵唔搵到食？華華唔係專家唔敢答，但睇睇我哋香江幾個3G台，強如超人都要賣碼頭輸血，真係三個字講晒──一殼淚！家陣到隔籬疏打埠玩3G，佢哋又點搞呢？
馬交官府電信辦上星期出咗3G發牌文件，打算第一階段發三個牌，兩個行WCDMA同埋CDMA1X制式，第三個牌呢，雖則話睇市場情況，兼且官府一定會技術中立，但應該係睇阿公行咩制式就真，電信辦最快會響7月5號出嚟解畫，截止日期係7月28號，估計馬交居民最快可以響明年初有3G手機用。

攞牌平過香港

投個馬交3G牌要幾銀？初步睇到係先畀20萬臨時擔保金，中咗標就將擔保金加碼到200萬再加發牌費10萬，仲要畀官府相當於收入5%嘅年度經營費用……好似點都平過我哋呢邊。
其實，3G呢家嘢冇又唔得，有又頭痕，所以先嗰排一早響馬交落腳嘅和記同數碼通、祖國嘅聯通，都表態話好有興趣……但華華唔明，香江呢邊有辦你睇，700幾萬人口四個3G牌都搞到咁嘅田地，馬交頂盡得50萬人口，都仲諗住整三四個牌，業界鬼殺咁嘈話分餅仔云云，真係唔知何厚鏵呢條究竟係咩數呢！
讀者如有任何意見或報料，歡迎發送電郵至
[email protected]。
李華華