苟芸慧噚晚到跑馬地出席時裝品牌活動，佢暴脤唔少，雖然大哂事業線，但略嫌太過臃腫，泊住同場瘦削嘅吳千語，認真牛髀對蚊髀。

對於近日工作不斷，苟芸慧指要多謝公司同事幫佢安排，同時亦都多謝傳媒。記者指佢因為緋聞帶挈，苟姑娘就即刻強調唔關緋聞事，並感激同事幫佢接工作，佢話：「要公平啲，Fair啲，好多人幫手。」

提到緋聞男友郭富城近日喺珠海參加「奧迪R8LMS盃」業餘賽車組賽事，因炒車而無法進行賽事， 苟芸慧指同城城冇聯絡，但有睇有關報道，強調大家知幾多佢亦知幾多，因為到時從報章上得知，記者取笑佢特別留意城城新聞，佢就尷尬話：「唔係留意，係留意自己新聞，睇下有咩需要回應，好似一般觀眾睇新聞啫。」

而佢有份主演嘅《金枝慾孽貳》收視跌破廿點，當日傳出佢硬撬熊黛林牆腳時，曾惹來網民聲言罷睇，未知係咪因為咁拖累收視?佢就話：「相信唔會關事，唔會有人咁做，呢部劇好多嘢都要慢慢睇，要啲時間。」

至於佢發脹唔少，苟芸慧直言要積極減肥，公司亦有幫佢傾纖體工作，現時要努力減肥，因為佢6月會開新劇，到時更要做警察，所以要盡力KEEPFIT，佢話：「先去水腫，之後盡量減，最好有返個SHAPE，想好似以前選美時一樣，個時係最FIT。」





逢周五隨《蘋果日報》附送嘅時尚美容雜誌《add》雖然早已派完；拎唔到書嘅朋友，可以上番《add》嘅官網 http://hk.add.nextmedia.com/睇番足本網上版，除咗有李嘉欣訪問，仲有好多時裝靚嘢睇！