當年今日

自認拍拖十年想見家長
「小小超女友」冒雨等兩粒鐘

蘋果日報 2002/09/19 00:00


城中鑽石王老五、有小小超之稱的李澤楷早前才發表公開招募女友言論,想不到前晚即有一位女士到其寓所門外守候,她自稱與李澤楷拍拖十年,還表示非君不嫁,並希望李澤楷盡快公開二人情侶關係。
前晚十時半左右,一名三十一歲女子孔美嫻在半山裕景花園外,冒雨獨自撐着傘呆站,聲稱是等候與她拍拖十年的電盈主席李澤楷,她還透露自己於八月份開始,不時會到上址等候兩個多小時,只求見愛郎一面。

曾任職盈科保險
孔美嫻接受訪問時,含羞答答地講述與李澤楷的「相戀經過」,情節有如電影《嫁個有錢人》及《網上情緣》的混合版。孔美嫻說:「我哋九二年開始,拍咗拖十年,係朋友介紹認識㗎。開頭我都唔知係邊個追我,只知係個有錢人,九三年先知佢係李澤楷,我以前都有喺佢間(盈科)保險公司做過嘢,大家見過吓面,其實我哋拍拖方式只係傳下email同ecard,冇拖過手㗎。」
問孔美嫻何解沒與李澤楷拖手?她說:「我哋每次見面都好短暫,起初冇講實係情侶,近兩、三年先講實個關係。我哋平時冇乜消遣,send吓email囉。」那麼李澤楷在電郵中都寫甚麼?孔美嫻說:「埕埕塔塔嗰啲囉,好隱晦㗎。」
孔美嫻怕不怕被指貪求李澤楷的金錢?她說:「佢冇畀過錢我使,我唔係貪佢錢。我哋識咗十年,了解得好深入,佢好叻。」孔美嫻又謂曾等到李澤楷,但對方沒停車,令她很難過,不過她沒有表達給李澤楷知道。記者後來問她會不會覺得對李澤楷造成騷擾?她卻說:「唔係,當初佢冇停車望我,同我做手勢指指吓,我都唔會再等佢啦,當初係佢主動追我㗎。」
孔美嫻又謂她與李澤楷現時感情穩定,二人亦有提過結婚事宜,她說:「我有同佢提過吓結婚啦,佢都有sendemail畀我講過吓,又有靠朋友傳口風,我哋未見過家長,我都想見佢家長。」問孔美嫻是否一定要嫁入李家?她說:「哈哈,係呀,非君不嫁呀。」
夢裏都有李澤楷
問孔美嫻是否認識李澤楷最新的緋聞女友、法官李素蘭,她說:「冇直接識,佢朋友係我舊同事囉。」至於李澤楷日前公開表示要招募女友,她則謂:「哈哈哈……我嬲到震呀,佢冇知會我,佢講吓笑㗎啫。」孔美嫻自爆曾到李的公司等候,但只是交低張卡就走,她續說:「我都試過發夢見到佢,佢係我第一任男友。」到昨日凌晨十二時許,裕景花園保安詢問孔美嫻為何在等候,她即害怕地截的士離去,離去前被問到怕不怕被指黐線?孔美嫻說:「都怕㗎!」

日寄百五Email
電盈首席副總裁胡雪姬昨日就此事回應說:「我知呢個癡情fans,佢叫孔美嫻,英文名Adeline,年幾前開始纏住Richard(李澤楷),高峰期試過一日send一百五十幾個email過嚟,所以見到類似嘅名都block咗佢,亦知會咗保安部,因為始終要考慮到Richard嘅人身安全,不過都知道佢係冇惡意嘅。聽啲保安講,佢噚晚狂追住Richard架車,但Richard其實唔喺車入面,佢重同保安講話要瞓上車頭。」
胡雪姬透露李澤楷有幾位癡心fans,她說:「我哋通常會用溫和嘅方式叫佢哋離開,Richard好忙,佢哋咁年青貌美,有大好前途,唔好浪費時間啦!」
孔美嫻透露她家住葵盛邨,中七畢業後,曾於恒生商科修讀銀行業。
而九九年開始,亦曾有一名內地來港的癡情女子趙欣雪到中環盈科集團總部門外等候李澤楷,更硬闖其寫字樓,只為見他一面,後被報警驅趕。