女讀者J女士來電郵，要求代尋王世瑜（阿樂），請佢幫手用治癌秘方療理親人。真對唔住，左丁山只知阿樂早已移民加拿大，以前也曾在「名采」寫稿講好多秘方、異事，但唔知阿樂身在何處，鎖你鎖你。
馬主H去見一位老闆K，老闆K因為競爭對手唔遵守諾言，臨時變卦，違反事先講好嘅競賽規則，面口唔係幾好睇，口中唸唸有詞，馬主Ｈ知悉情況之後，安慰佢幾句，然後說：「世情如此無謂拗，唔通你會naive到以為大家講咗就係嘅呢咩，講完就算嘅喇！」老闆K係見過世面嘅人，唔開心一陣就冇事，重即刻考試：「喂，你嘅上聯幾好，世情如此無謂拗，不如你對埋下聯？」馬主H為之愕然，但已騎上虎背，惟有硬着頭皮話：「條氣唔順去隻揪！」老闆K聽完哈哈大笑而去。
馬主H其實墨水有限，驚住有錯，打電話搵馬場名人才子樂，叫佢潤飾一下。才子樂不假思索就話：「平仄有啲唔啱，好易改啫，改為：『世情如此無須拗，條氣唔冧去隻揪』就搞掂。」才子樂果然文思快捷，佩服之至。
次日馬主H碰到報壇才子韓公，問以同樣問題，韓公話馬主H對對唔係咁好，鋼水筆一揮，改為「世情如此無端鬧，條氣一輸對隻揪。」又係好嘢，讀過書，肚裏有墨水啲人，馬主H點敢唔服。