日本勁旅L'Arc~en~Ciel主音HYDE再度來港，今晚喺九展Star Hall開騷舉行「HYDE ACOUSTIC CONCERT TOUR 2018 黑彌撒 ASIA」演唱會。

HYDE昨日甫抵港即騰出時間接受本地傳媒訪問，今次把演唱會移師到中港台，剛剛結束上海及北京站，HYDE談到成功完成中國演出十分感動，當談到對大陸粉絲印象時，佢不禁笑住話：「最初想像中國歌迷會好嘈、好癲，又會走來走走，但開騷前作出廣播，呼籲觀眾靜靜地坐低睇騷，果然全場也靜心欣賞。」HYDE補充話開騷時氣氛的確有點緊張，但中國fans卻令佢感到放心及溫暖。近期巡迴各地開騷，HYDE表示必定會帶睡衣，因為穿睡衣瞓可避免冷親。

原來HYDE今次到港唔止開騷，此行仲會留多陣展開拍攝工作，透露會到比較特別嘅地方取景。HYDE平時都愛散步，佢自言演出前盡量唔飲太多酒，問到知唔知自己個樣係好多日本男士嘅整容指標？HYDE謙稱：「我知道，雖然好開心，但我自己都有好多地方想執，其實比我更有型的男性大有人在吧！」當被問保養心得，HYDE竟然話全靠手機app，仲自爆愛用LINE Camera執相，亦會用來繪畫圖畫。HYDE自設個人服飾品牌SWITCHBLADE，有記者建議佢日後將音樂結合成時裝騷，HYDE聽完即話：「Good Idea!」又話到時不妨充當模特兒行騷。

早前再為中島美嘉炮製新歌《KISS OF DEATH》，對於兩人相隔13年再合作，HYDE大讚對方好勤力，歌曲好有女性味道，佢笑言一想像自己日後翻唱此曲就覺得有啲核突。

精選娛聞，喺晒《娛果》
http://fb.com/appledailyent