馬主親口證實
告東尼飛起韋達!

蘋果日報 2015/10/01 00:00

莫雷拉韋達友瑩格幸福指數告東尼兵威振短途馬王

現時香港兩大短途馬,分別係「友瑩格」同「幸福指數」,由於「友瑩格」年紀比較大,唔少人睇好未來係年輕馬「幸福指數」嘅世界,有力成為新短途馬王。但國慶日「幸福指數」將季內復出,佢嘅好拍檔十三屆冠軍騎師韋達,卻走去騎同場嘅「兵威振」,由於韋達同「兵威振」馬主家族鞋王Le Saunda老闆李子彬關係密切,令人覺得可能係佢主動放棄「幸福指數」,但原來事實啱啱相反,係韋達被「幸福指數」練馬師告東尼飛起。
「幸福指數」馬主黃凱汶透露:「韋達都騎得幾好,但唔係我唔要韋達,而係告東尼想搵其他人試吓,於是易配莫雷拉!」
吓,韋達咁高級數都被飛,冇辦法啦,學姜大衛話齋,最鋒利嘅刀都有生銹嘅一日,何況係人?韋達已經43歲,好多人話佢嘅活力不及以往,騎功亦公認比不上新一代冠軍雷神莫雷拉,何況韋達3月嗰陣夥拍「幸福指數」遠征杜拜僅敗屈居亞軍,到4月本港二級賽一役更跑梗頸四,多少都促使告東尼決定換人。
講番嚟緊國慶日之戰,「幸福指數」曾經喉嚨有過毛病,黃凱汶說:「係有少少事,但練馬師話冇乜大礙,家陣各方面都幾好,冇乜問題。」的確「幸福指數」最近由雷神試閘操練,走勢相當好,拋離後面嘅馬好遠吓,狀態肯定有水準,如果國慶日真係贏到,睇怕韋達都一殼眼淚。