當年今日

中環在線:聯滙23歲任總緬懷搶尿片 - 李華華

蘋果日報 2006/10/13 00:00


時光飛逝,已奉為本港金融體系基本法嘅聯繫滙率,唔經唔覺,原來已行咗23年,下周二(17號)便滿23歲,當年有份制訂聯滙政策,家吓仲坐鎮財金部門嘅官員,全香港只剩番金管局總裁任志剛一人,難怪佢老哥要喺每周專欄《觀點》內,撫今追昔一番。
23年前,港元仲未同美金掛鈎嘅動盪日子,港元一度貶值至每美元兌9.6嘅恐慌水平,任總特別寄語剛滿23歲生日嘅小朋友,唔好唔記得親親爹哋媽咪,皆因父母除了含辛茹苦,將呢班化骨龍帶到世上,面對港滙貶值物價飆升,阿爸阿媽仲要撲去超市,搶購尿片!
好彩當時做緊首席助理金融司嘅任志剛,子女已經脫離上述「尿片期」,否則任總一邊要打仗;一邊又要張羅尿片,就真係百上加斤。不過,即使倖免於搶購尿片,當年一眾市民,仍要在超市大排長龍,忙於囤積食米、廁紙等日用品。
本港自83年起實施聯滙,港元按7.8固定滙率與美元掛鈎,23歲及以下嘅年輕一族,從未試過港元浮動滙率嘅歲月,任總回顧話,原來喺74至83年,實行浮滙制度這9年間,本港嘅貨幣基礎唔單止冇乜控制,連貨幣政策嘅研究同規劃都極少,當時擔任半央行角色,負責銀行同業嘅港元交易結算,就靠晒一間商業銀行(唔講名都知係獅子行)。相比𠵱家,聯滙制度不斷優化,雖然貨幣危機往往不可預測,但任總對現時貨幣穩定及成熟程度,都深覺安慰。
empty