多得前特首梁振英同現任特首林鄭月娥嘅功勞，令而家香港越嚟越兩極化，想行中間路線嘅人條路就快變掘頭路。好似自命係「西環曳仔」嘅建制派謝偉俊，結果都要泊去自由黨榮譽主席田北俊牽頭嘅新平台，噚日仲同埋田少落區派口罩添。

其實田少一直幫佢個新平台招兵買馬，想行中間路線嘅謝偉俊可謂一拍即合，而謝偉俊仲做埋田少平台嘅法律顧問，田少亦禮尚往來，噚日同謝偉俊一齊去謝嘅選區九東麗港城派口罩，一共派4萬個咁多。不過田少就冇喺自己FB宣揚，反而謝偉俊就有出po。

八方問過謝偉俊派口罩嘅情況，佢話尋日落住毛毛雨，都派咗個幾鐘冇停手。佢又提到而家同田少主要係合作做社區防疫工作，但係政治上就各有各做。其實行中間路線都真係唔易，好似謝偉俊都建議過角逐內會主席嘅民建聯李慧琼退選，解決內會選唔到主席嘅問題，不過李慧琼即刻鬧叫人退選唔公義，八方不禁要問，難道DQ候選人又好公義咩？

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架
-----------------------------
App內1-Click訂閱《蘋果動新聞》
按此了解更多