咖喱牛腩:攻攻攻總有回報? - 牽牛

蘋果日報 2012/09/25 00:00


咖喱牛腩,有辣有唔辣。牽牛同咖喱將總結每周球賽,見到抵讚嘅事,牽牛定必重重有賞,用幾百字大讚吓佢;但見到抵鬧嘅人,咖喱就會毫不留情,省佢一餐。
《牛腩篇》面對甘辭厚幣,有人選擇背棄信仰同道德,原居民領袖以「發展就是硬道理」做藉口,連祖宗祠堂都可以出賣,仲可以面不紅耳不赤咁振振有詞辯護,同以前兒皇帝石敬塘有得揮。不過唔係每個人都會為五斗米而折腰,修咸頓上季千辛萬苦先攞到英冠聯亞軍直接升班,2005年後再嘗英超滋味,加上經過球會幾乎陷於破產兼跌至英甲嘅慘痛經歷,邊個都知道,有得玩英超,每季至少有幾千萬鎊收入,一降班就幾乎冇7、8成收入。難得開季4連敗嘅修頓,冇因此而怯咗,繼續佢地嘅主攻風格,終於畀佢哋博番一場勝仗,4:1反勝維拉開齋。中下游球隊最work嘅打法,就好似史篤城、新特蘭咁,吓吓講硬淨、體力化,防守屯重兵,靠死球博吓入波。主攻風格唔係護級上策,就算強如史雲斯,開季兩連勝後都開始走下坡。修頓由開季4連敗,一直換嚟雖敗猶榮嘅評價,不過積分榜都仲係0分,領隊艾堅斯冇自亂陣腳,就算對維拉半場輸一球,都仲係攻攻攻,當然努力係有回報。30歲嘅列基林拔就當然最勁,個人梅開二度,已經累積4個英超入球,多過費托、阿古路、普多斯基等國腳級前鋒。但平心而論,修頓護級前景始終唔係太樂觀,場場都失波,恐怕好似黑池前季咁,贏口碑但失席位。文:牽牛