前高官葉澍堃退休後，生活優哉遊哉，鍾意同埋太太及家人，四圍去食嘢，又做過飲食節目嘉賓，變成出名嘅食家。佢現時亦係馬會大董，有好多時間入場觀戰，真正享受人生。
不過葉澍堃呢排就忙啲，今個月佢首次做爺爺，大仔瀚林同新抱嘅結晶品喺養和出世，母子平安，做爺爺嘅就梗係要多啲睇粒孫啦！
而練馬師葉楚航一定識做，會盡力幫葉澍堃隻「跑寶貝跑」，爭奪周日二級賽短途錦標，作為送比佢嘅賀禮。呢匹馬嘅英文名叫GoBabyGo，夠晒應景，計實力亦都好有份量，正正就係上屆短途錦標亞軍，只輸短馬頭。「跑寶貝跑」上場頂磅下得第四，反映狀態已經回勇，今次有好手貝湯美策騎，仲要排一檔，啱晒佢快放，睇嚟葉澍堃除咗喺屋企有個孫仔Baby之外，喺馬場亦要大嗌GoBabyGo。