求驗客手記:3將傷膝 威爾遜唞半年
般茅拜四角趁早

蘋果日報 2015/10/01 05:20

求驗客手記英超般尼茅夫升班馬FANTASY威爾遜格拉度泰朗明斯

好邪呀!英超升班馬般尼茅夫竟然喺一個月內,有三名主力同樣因為膝十字韌帶重創而要長唞,最新一位「十字兵」仲要係球隊首席射手哥林威爾遜,預計呢名23歲前鋒起碼要唞六個月!睇嚟般茅周六迎戰屈福特前,領隊艾迪賀維要嗱嗱聲喺主場拜吓四角先得喇。
哥林威爾遜上季喺英冠入咗廿粒帶領般茅升班,加上年輕有活力,所以今季好受英超官方Fantasy玩家歡迎,全球有超過兩成玩家都用佢;威爾遜亦冇令球迷同捧場客失望,今季英超已經有五球進賬,外界仲睇好佢好快可以由英格蘭小國腳晉升大國腳。點知喺上輪般茅不敵史篤城一役,威爾遜勇戰受傷,要由擔架抬離場;檢查後仲證實佢右膝十字韌帶撕裂,起碼要唞六個月。
最邪嘅係,威爾遜已經係球隊一個月內第三位重創同一部位嘅球員,因為般茅兩名今夏最貴嘅新兵──轉會費800萬鎊嘅後衞泰朗明斯同身價700萬鎊嘅攻擊球員麥斯格拉度,都喺8月29日打和李斯特城嘅聯賽重創膝部十字韌帶,兩個都係有排唞。
遇上咁嘅情形,迷信嘅朋友梗係會質疑般茅係咪季初冇拜神,特別係喺球場拜四角。雖然西方人同中國人唔同,但般茅嘅俄羅斯班主丹文出咗名迷信,喺上季球隊爭升班嗰陣,就試過因為覺得自己入親場球隊都失分,佢真係寧願唔入場!睇怕就算領隊賀維唔願意,喺呢個禮拜六迎戰屈福特前,都可能要去拜吓四角。
對於球隊傷兵一個接一個,賀維就話:「哥林威爾遜今季表現咁好,𠵱家竟然重創,我真係好失望;不過,我肯定佢復出之後會變得更強。而且我之前已經講過,遇到咁嘅情形,隊中其他球員要更加落力,爭取機會表現自己。」據報般茅亦已經開始物色球員,喺一月轉會巿場重開嗰陣幫球隊補充戰力。