香港財赤愈來愈嚴重，加上民間對政府的訴求愈來愈多，房委會都要賣家當，暫時見唔到財赤問題有解決曙光，結果連大熱人選馮國經都耍手擰頭，試問又有邊個敢做財爺呢？
ｉ師傅話，馮博士基本上係下屆特首大熱人選，冇埋由現時肯屈居阿董之下，重要坐埋呢個吃力不討好嘅三煞位，不如阿董直接向馮博土讓出特首之位算啦。
現時市場正觀望港府能否覓得令人信服的才智之士當財爺，但阿董似乎已冇太多選擇。港股噚日表現平靜，收報9939，升16點，成交67億元。下周期指結算，港股好難再平靜。

嘉國具相同概念
信德（242）被澳門娛樂增持13%，市場即憧憬信德可能會獲注入澳賭業，刺激信德股價勁升16.8%收2.425元。
事實上，自從本地樓市被阿董玩殘後，信德只剩得船務支撐，若不再搞搞新意思，此股再難吸引投資者，而賭業似乎好受投資者歡迎，所以真係有得諗。受到信德急升帶動，另一隻具賭業注資概念股嘉華國際（173）亦大升5.6%。
華豐環保紡織（364）以每股1元配股後，股價一度受壓下跌，其後又回升，噚日收報1.19元，升5.3%，成交高達9084萬元。包銷商話華豐每股值1.78元，唔知會否坐言起行呢？黑客話，聽聞好多炒家已沽貨獲利，唔知後勁如何？
新怡環球（1094）噚日再升7.7%，收報0.35元。e莉莎話，據講公司好快就會批股，後市表現則要睇配售代理嘅售後服務。
阿虎