股市身歷聲:正中狂瀉古仔未完

蘋果日報 2002/07/21 00:00


上個禮拜港美股市散晒,令到好多本地投資者都喺中銀(2388)認股上放軟晒手腳,唔肯向卜架行借錢落飛,早前話會大手落飛班大陸客,亦不了了之,所以做唔到預期嘅效果一啲都唔出奇。其實伏勝認為隻中銀唔係咁正,一來客戶過份集中喺本地,二來手頭上嘅壞帳到底有幾多實在好難估計,要咗貨嗰班芬佬,為保險計未必肯長揸,可能好快就沽番出嚟。就算買咗貨嗰班大孖沙,相信都係同你玩50公尺短跑,睇吓到時邊個走貨走得快,就有餐晏仔。

貪平可能得不償失
除咗中銀認購反應麻麻地之外,就連原本重可以炒下上落市嘅三四線股仔,喺部份股票行收縮信貸下,開始收晒油門,好多股仔即刻瓜到直,就好似隻正中藥業(327)咁,上個禮拜頭原本重係企喺三毫子附近橫行,但到禮拜五收市時,已經跌到得番五仙三,唔見咗8成有多。
今次隻股仔急跌,聽聞係有好幾間證券行同時斬倉,最神奇嘅就係急跌前突然有好多人打嚟話呢隻股用0.225元批4000萬股出嚟,話要砌高個價,因為係明益自己友,話明兩個禮拜內唔准沽貨,喺咁嘅市況,伏勝梗係無本事亦無興趣要啦。
事後聽番班卜架講,原來呢一次批股完全係有心搵人笨,事關今次大戶被斬倉,主要因為揸到成手貨被迫倉,大戶明知搞唔掂,就諗住走得幾多得幾多,周圍同人講只係批4000萬貨出街(但聽講要出嘅貨就遠遠唔止呢個數目),結果到間卜架行星期五下晝開市唔見有錢到,見買盤就掟,個價好快咁就畀人隊到落去5仙。據聞呢單嘢重未完,有卜架話個價分分鐘重要散多一劑,叫大家千祈唔好貪平。
伏勝