當年今日

新舖速遞:一店分四區 烏冬遇上牛肉汁索晒

蘋果日報 2006/10/13 00:00


壽司、刺身、鐵板燒、和食料理……嗚,瓣瓣都咁想喫,好難揀呀。的確,港人超鍾意日本菜,日本食肆開到一街都係,可惜舖仔居多。銅鑼灣有新店,14,000呎面積分四個區域,坐得你舒舒服服,一味和牛火鍋慢慢歎,唔使迫唔使趕慢動作啜埋條索滿肉汁的稻庭烏冬,呢餐,正到爆呀。
記者:蘇振鵬
攝影:楊錦文
模特兒:Bianca
面積夠大坐得舒服
「和三昧」面積超過14,000平方呎,自稱係香港最大日本食肆,係咪最大,我無Check過,淨係知餐廳有200個座位、8間半隱蔽式貴賓房、15組獨立式卡座,仲分開鐵板燒、和風料理、壽司吧同Cafe四大區域,各區域位置寬敞,絕非一家五口霸坐鐵板燒區就已經滿座,要其他客人遷就坐過隔籬嗰亭女人街豆腐膶日本舖仔可比,無吹水,採訪當日,我仲同攝影哥哥走失過㖭,枱與枱距離亦足,客滿都唔覺迫。顏色則以棕、米白同啡色做主調,配天然雲石牆壁、真皮沙發式座椅,坐得舒服,最正係餐廳喺22樓,仲可以望埋維港靚景。
empty
■和風料理區
empty
■壽司吧區
empty
■鐵板燒區
empty
■Cafe區
千登世原班人馬坐鎮
「千登世」喺銅鑼灣響晒朵,但隨住三越結束,原班人馬就過檔「和三昧」,𠵱家餐廳有入廚超過廿年嘅黃偉豪(Ken)行政總廚同日本名廚八木總彰師傅坐鎮,Ken話:「舊店有熟客有口碑,『千登世』結業呢段時間,我哋成班廚師都無得閒過,希望度多啲新菜式出嚟,等客人有更多新鮮感。」睇番食物,純個人喜好,我覺得和牛火鍋最正,牛肉脂肪分布外脆內軟,食到唔停得口嗰隻。至於鐵板燒區,燒爐通風位設於下方,唔會搞到成間舖一陣油煙味,Ken仲即席示範澳洲黑邊活鮑魚鐵板燒:「以前喺『千登世』我會切片上,𠵱家我就會切粒上,咁樣食口感更佳。」
empty
■Ken示範燒澳洲黑邊活鮑魚,連殼燒。
empty
■鮑魚比手掌更大隻,受熱,開始離殼。
empty
■切粒,灑少少鹽,加白酒、牛油同檸汁調味。
豪州神戶極上和牛火鍋
頂級牛肉,呢個價錢屬M6級數,先用牛脂起鑊,先煎菜再煎牛肉,食嗰陣點生雞蛋同甜豉油,雞蛋來自日本,經無菌處理,食得放心。最後淥埋個稻庭烏冬,烏冬索滿牛肉汁,入口煙煙韌韌,正。
empty
$880
燒物盛
廚師揀最時令大海蝦、松葉蟹、鮑魚、海膽等海鮮,燒嗰陣只加海鹽,務求食出最鮮原味。燒物亦可散叫(散叫$90起),但散叫就無栗子、銀杏、南瓜等配菜。
empty
$800
吉列薯茸大海蝦
大海蝦釀薯茸,吉列方法點麵包糠炸,炸粉薄薄唔會太油膩,蝦嘅鮮味同濃濃麵包味好夾,我食咗兩大碟。
empty
$90
鐵板燒
鐵板燒海鰻/響螺
海鰻用蒲汁燒,Ken用特製道具壓住燒,令鰻魚受熱更平均,更香口。北海道響螺用白酒、鹽、牛油、檸汁燒,鮮味十足。
empty
鐵板燒象蛂蚌
食其鮮,搞咁多花臣盞浪費如此新鮮象蛂蚌,所以簡簡單單用白酒、牛油略燒,再加少少鹽同檸汁,Last撒黑椒,好惹味。
empty
$180/80g
鐵板燒鵝肝
鵝肝非常受港人歡迎,廚師話呢個厚度剛剛好,我就話勁大塊嘞。未食已經聞到超甘香,入口超綿滑,只係膽固醇勁咗啲啫。
empty
$160/60g
壽司盛A
有12件壽司同2條卷物,廚師揀時令靚料做壽司,所以款式次次不同,今次有大拖羅、大池魚腩、赤貝、象蛂蚌、毛蟹膏、北海道海膽、三文魚翅等等,全部係貴價貨。
empty
$580
刺身盛A
刺身種類以時令海鮮決定,平均有9至10款左右。今次有青龍魚、霜降拖羅、北海道海膽、牡丹蝦、油甘魚、鰹魚、吞拿魚背、赤貝、象蛂蚌等等。廚師會燒一燒鰹魚,令牠半生熟,發揮更佳味道。連刺身都會加入創意,欣賞。
empty
$880
Bianca:「鮑魚好正,第一啖啜落鹹鹹地,我估應該係海水鹹味,鮑魚好鮮好有咬口,夾埋檸汁好醒胃,下次會再幫襯。」
empty
阿楓:「呢度嘅鐵板燒好正,一來夠正宗料靚夠新鮮;二來燒爐嘅抽風位唔似其他舖頭咁整喺上面,坐得幾舒服。」
empty
孫先生:「ShabuShabu幾OK,而且坐喺和食位可以望到海景,一流。」
empty
搵食攻略
和三昧(28318989)
營業時間:12:00nn-3:00pm,6:00pm-11:00pm 
地址:銅鑼灣軒尼詩道555號東角中心22樓
交通:銅鑼灣地鐵站D2 座位:200個
最好賣:澳洲黑邊活鮑魚、清酒煮蜆、和牛火鍋、壽司和刺身