肥佬電謝 四萬獎金 三年唔炒
突發英雄……張家樂
追新聞、跟疑匪、按掣、趴低、再按掣、再走再按掣按掣按掣……一切出於本報突發記者張家樂的本能，幸好，這次槍彈只在他身旁擦過，沒有賠上性命，卻當上了英雄。這張貼身追蹤、近距離捕捉縛匪逃走一剎那的相片，全城震撼。
「當時，根本冇乜感覺，只知道要影到好相，事後至知驚，但驚咗冇耐又擔心究竟剛才影咗啲乜？到相片沖咗出嚟，又諗唔知其他行家點呢？會輸？還是贏？」一張照片教他忐忑了一個晚上，是夜，一行數十位上司、同僚跑到尖沙嘴消夜，一邊守在報攤旁等待別的報紙出版……看到了，一比之下，終於能鬆一口氣……飲杯！折騰了一整天，只吃過三文治和一碗米粉的他，此時，終可開懷暢飲，大吃其台灣料理，三圍枱，六千大元，盡興而歸！
記者：鄒家鳳 攝影：陳偉強、陳智良
部分相片由被訪者提供
去到盡
難怪得戚
一張相片，張家樂成了紅人，訪問的個多小時內，他的電話響個不停，「係呀，唔係咩呀……請食飯？好呀……」「多謝多謝……但我好忙喎……我今期紅吖嘛！」「乜話，記協要我講Talk？」嘻嘻哈哈，三十一歲的他有點兒得戚。
這次不但是他的個人榮耀，也為整Team人提高士氣。老總堅哥已承諾三年內裁員不裁他，連肥佬黎也親自致電給他：「我看到報紙，好開心，做得好！」還有四萬大元獎金作鼓勵，甚至有讀者想給他五千元表示心意。難怪，他會這樣得戚。
「其實，都是盡本分而已，三百蚊人工也好，三萬蚊人工也好，我都一樣，去到盡。」
神勇幹探
人人都說他像神勇幹探，多過像記者，如果他拿的不是相機，而是一支槍，或許，可以把縛匪一網成擒，立建奇功。
「係呀，我細個嘅志願就係做警察，可惜大近視吖，當時又冇錢配Con，更加冇甚麼激光，那惟有死心。」不過，樣子瘦削、黑黑實實、嬉皮笑臉說話沒正沒經的他，說實話，似一名蠱惑仔多一些。
自小在屋邨長大的家樂，因見盡不少蠱惑仔橫行霸道、蝦蝦霸霸，所以希望將來可以做個正義的超人，警惡懲奸；雖則心願未償，但當記者同樣也可為民請命吧！
「不過，有時都好無奈，遇到死人冧樓，重要訪問人哋家屬，都預咗俾人鬧，唔鬧就執到，肯同我講嘢簡直要還神啦。」
生命威脅
要還神的，可能還因每次身處險境，他都能化險為夷，尤其專責油尖旺區的他，遇上危險情況較多。
「那次在廟街，有一名江湖大佬清晨被斬，當我到達現場時，看到一名警察站在瞓喺地上的大佬身旁，還有十多名靚在側，心諗，瞓喺度嗰個太悶喇，成班人企喺度嘅場面偉大啲喎，於是舉機就影。第一張，個個樣都呆呆滯滯，但咔嚓一聲，他們發現了我之後，便向我衝過來，指着我：『重影！』影！等我影埋呢張先，咁有型。」結果，這張手指指的靚相影到了，代價是給人揮了一拳。
9413
「俾人打，都慣㗎啦，咪即刻叫『阿Sir，阿Sir』，然後匿喺警察身邊囉！通常都可以壓住個場面嘅。」但當然也會有例外，那讓他第一次感受到生命受威脅。
「像是去年夏天，加拿芬道有一製作公司老闆揸車冇戴安全帶，被交通警攔截，發生爭執，本來小事一樁，但老細一『吹雞』，走出二十幾個蠱惑仔來；警方增援，又召來二十多人，一時間幾十人圍住成條街，雙方對壘，場面震撼。雖然班蠱惑仔叫住我唔好影，但好嘥料啫，咪照影囉，咪又照俾人揼囉，但呢次叫阿Sir都唔掂，場面失控，第一次，俾人打到要走，第一次感受到生命受威脅。」話雖如此，但他卻不信邪，否則，他的手電又怎會揀上「9413」這四個號碼。啋！大吉利是！
曉轉彎
垃圾調查
吸着張家樂的二手煙，聽着他說故事，代入不同角色，說得眉飛色舞，很有趣；大概，他說自己從小已是醒目仔一名，反應敏捷、讀書唔叻考試叻，也該不難令人信服吧。
「我喺浸會讀地理，好騎呢，皆因當年會考地理攞A，ALevel地理又攞A，那就讀地理吧。」但畢業後他卻跑到Domino's薄餅店做經理，直到員工們因一些小事要辭職，他便隨大隊一齊離開；之後，他做了兩個月臨時工，為環保團體在將軍澳堆填區訪問垃圾車司機，「你啲垃圾邊度嚟㗎？」同樣騎呢。
沒女人緣
「可能聞慣陣『除』，兜兜轉轉都係要來將軍澳返工。」研究完垃圾，他又回到薄餅大家庭PizzaHut做經理，但不足一年又喊悶辭工。「有次女友看到《蘋果日報》招聘突發記者，叫我試試，我話：『好呀，你幫我約個時間囉！』」就這樣，由《蘋果》創刊至今，做到第七個年頭；可是，女友，卻沒有了。
是工作不定時，公眾假期又要開工，影響感情？他說：「可能啦！」提到女人，家樂剛才的調皮收斂了，噴出一口煙，說不要再提了，只說自己沒有女人緣。
利誘儍子
美人關，對英雄來說，永遠都比過五關斬六將難；儍人這一關又如何？
「有個Job說有人斬手指，我盲舂舂去到現場，警察話佢儍儍哋，但『儍儍哋』三個字交不了差，於是，又跟住個傷者到醫院，跟住佢搭𨋢，佢問護士小姐要煙，冇人理佢；出𨋢後，我就引誘佢：『要煙嗎？要就跟我來。』結果成功同佢傾談，但原來佢真係儍！」第一次報紙上登有「張家樂攝影」的相片，就是那個儍子。
廿呎水渠
當突發記者，除了要懂得隨機應變，還要有一副好身手，起碼要走得夠快，追新聞、逃跑都不會輸蝕。家樂這點卻胸有成竹。
「我平時都會玩Gym，練跑步、游水，冬天我就最鍾意去滑雪，有時又會去玩爬山電單車，所以時時都咁Fit。講真做突發真係少啲氣力都唔掂。好似早排，為了要影一張垃圾車懷疑藏屍的相片，我爬了二十幾呎高水渠，點知爬到上去，至發現個角度根本影唔到車斗裏面，嘥料！」
今天，有氣有力，五年後有力有氣，十年後有氣冇力，十五年後……家樂也知做這行的生命很短暫，惟有做得一日得一日。
「其實，做突發好得意，成日好似冇嘢做咁，行行企企，真正做嘢嘅時間唔多，容易『揼』懶個身；我覺得過埋今次，好似乜都試過，有種都『差不多』的感覺。不過，我亦開始為將來打算，儲多個錢，即使被人炒，也有多餘錢慢慢搣。」如今，他有個為期三年的免死金牌，暫時毋須擔心接大信封，還需繼續拼搏多三年，但小心為上，堅哥話齋：沒有一單新聞比自己的生命更寶貴！
Profile
姓名：張家樂
年齡：31歲
體重：126磅
身高：5呎5吋
擴胸前：33吋
擴胸後：35吋
學歷：浸會大學，主修地理。
工作經驗：Domino'sPizza經理、PizzaHut經理、《蘋果日報》突發記者。
滿自信
知道要訪問這位神勇記者，同事們都在起哄，「咁勇，問佢係咪當過差？」「身手咁好，睇佢一分鐘做幾多下掌上壓？跑一百米要幾耐？」「佢幾高幾重呀？胸肌有幾吋呀？」問題愈來愈過分。張家樂也沒有表演一下身手，「唔係嘛，我驚勁得滯，嚇親大家喎！」他還是一貫作風，自信心爆棚。