美國讀者CH來電郵：「本人喇沙中七畢業，加州社區學院DeAnza讀完之後，轉到加大貝克來主修應用數學──精算學……有乜前途！」首先恭喜晒，CH。由喇沙去貝克來（Berkeley），唔係咁易㗎，不過去Foothill或DeAnza讀過兩年（詳見《美國社區學院全攻略》一書），情況就完全唔同。
照計應用數學──精算學，係專門學科，最啱去保險公司做精算師；香港只有香港大學有得讀，係高考成績最好嘅學生先至收，難過入醫學院，貝克來嘅聲譽更高，更巴閉啦。你讀完最好喺美國考精算師牌，考完返嚟香港，冇理由搵唔到工啫，你副修商科，更加適合，喺香港或美國都唔難就業。
讀者Q小姐對五陵會有興趣，想知道入會程序，請你打電話去五陵問（2522-3872），照計呢個會嘅會員人數唔算多，入會冇大難度，呢個會嘅會員多數係商界、會計師、律師、證券界人士等。
讀者莫問題好難答，你問楊家將之楊令公死於何年何地，幾多歲？左丁山真係唔知，一時之間亦冇時間去查得到，幫唔到你，鎖你鎖你。讀者賓架Anthony指八月二十九日本欄寫GeraldTsai，應係GeraldTsaiJr.至啱，多謝指正，不過我以為我哋講親GeraldTsai大家都知道係蔡至勇，佢父親係邊位，好少人知道啫。蔡先生嘅六十年代成就引起好多報道，佢到咗九十年代，美國新聞界已經唔多報道咯！