一周三件:中化肥前景俏 - 錢雋

蘋果日報 2016/02/26 00:00


啱啱今年頭,被市場喻為「紅色摩根」嘅資產整合併購高手寧高寧,出任中化肥(297)母系中化集團掌舵人一職,場內對包括中化肥在內成系重組整合,多咗個有力嘅憧憬。
新舵手實力勁
中化肥到上年6月尾,銀行信用額度仲未動用資金高達248億港元,係中化肥家陣73億元市值3.4倍。又據內地媒體分析,中化系同新任掌舵人寧高寧接手前嘅中糧集團極相似,瓣數多但缺乏整合,所以中化系急需好似寧生嘅資產整合高手。睇到係,中化肥備用銀彈勁厚,加埋母系新舵手背景,對成系重組,或者中化肥本身所講全球視野資源獲取戰略,有憧憬。
中化肥上年上半年盈利一支箭增長近1.5倍,到3.4億元人仔,超過2014年全年盈利2.3億元人仔,場內專業預估集團就快派2015年成績單,EPS 6.8港仙,增長67%,如果無大撇減,中化肥應該有盈喜。又中化肥現價1.05元,插到落8年底,得0.42倍PB,係10年嚟最低水位,而港交所(388)中央結算紀錄,北水透過港股通所揸中化肥,達到3.17億股,佔中化肥所有已發行股數4.5%。呢個持股量,兼且佔咗中央結算系統參與者總持股量20.2億股嘅15.7%。北水持倉,揸到排頭位,絕對少見。
中化肥最近3年,一質穿1蚊,隨後會有一轉唔錯反彈,港股若果keep住喪插,睇中化肥3年橫行底0.92元,到時集團PB得番0.38倍,輕輕注先博反彈,當升25%到1.15元計,PB先得0.47倍,都仲未上到1年平均0.62倍,而中化肥10年平均PB,係講緊兩倍。

錢雋
細價股專家
本欄逢周一、三、五刊出