我哋約咗喺山頂等，於是懷着興奮嘅心情搭纜車上山赴會，10至15分鐘一班，收費$22，好彩遊客唔多好快就到。纜車上到山頂尾站，原來對正樓上就係PearlonthePeak，唔使周圍搵好方便。但係突然電話響：「Honey，我老細唔放人呀，今晚嚟唔到呀！」我心情猶如跌落地獄，心想就算求唔成婚都要食餐勁嘅！

走入呢間餐廳，已經俾個無敵View吸引住，位置前身係凌霄閣露天觀景台，𠵱家加咗上蓋做埋餐廳，喺兩邊牆做晒12呎落地玻璃，東至銅鑼灣、西至中環廣場，以至成個九龍半島及維多利亞港，都好似在我腳下；可能入冬關係，下晝5點45分太陽開始落山，可惜玻璃窗面向東南，睇唔到「鹹蛋黃」落山，但望住座座樓景灑着一片金光，然後轉化為萬家燈火，又是另一番風情！

Pearl有幾厲害就要從老店「墨爾本Pearl」講起。在02年開業的Pearl，以會萃各地名菜的「摩登國際菜式」而聞名，開業首年已獲得當地權威刊物《TheAgeGoodFoodGuide》頒發「最佳新餐廳獎」，04年更將主持人Geoff評為「ChefoftheYear2005」；今次美心集團旗下嘅m.a.x.concepts請到Geoff做顧問廚師，兼有兩名墨爾本Pearl資深廚師坐鎮煮菜，絕對同澳洲嗰邊一樣。

前菜：一上枱，嘩！蝦都可以做到藝術品一樣。兩隻手指咁大嘅虎蝦，配蝦肉忌廉燉蛋，面層澆上3支AppleCider及蘋果茸煮成的濃汁；醬汁甜甜哋，好能帶出蝦嘅鮮味。

主菜：紅酒、砵酒做成濃汁配鱸魚，中間有紅酒芹菜，最底是甘香洋葱薯茸；記緊要一次將3層食料放入嘴，軟、腍、香、滑味道多層變化，呢個係我嘅必食推介。

湯：3支原條粟米，先煲成湯，再拆出粟米粒熬成濃湯，真係原汁原味食晒，伴碟有蟹肉、紅毛丹、亁葱、芫荽等，份量唔多，勝在味夠。

甜品：點解嚟支雪茄？其實係脆皮忌廉鮮香蕉卷至真，外脆內軟幾新奇；另一杯是熱情果汁配燉蛋，配搭幾新奇，蛋仲要勁滑！

小女人最喜歡唔使錢嘅嘢，食完全個Course後餐廳會送一個自製法國軟心朱古力，全手製！有錢都未必買到。

正式坐低獨個兒撐枱腳，全部食物都係新鮮飛機貨，食環境、出品，百餘元一道菜都唔算貴；食嘢時發覺，全店只有5張真係貼窗的枱子，僅中間有一張王座，可獨享270°香港夜景（其餘4張為180°），侍應對我講：「呢幾張枱好搶手，好多人隔日已訂位，冇特別收費，先到先得；惟中間嗰張『270°王座』就設有$3,000最低消費！」我仲聽到餐廳在試業第三日，就有人特訂此枱向女友求婚，而且一說即成，所以餐廳內人人皆說它為求婚枱，我都以為Eric訂咗呢張枱同我求婚㖭！

吧枱睇靚仔品酒師
全場最靚仔邊個？我一定話係品酒師Dicken，佢曾經攞過法國知名WorldStyleMasterCocktailCompetition亞洲區冠軍，佢話全店有上1,000支存酒、180種款式，好多都係法、澳等地嘅上品；不過我都係鍾意佢調雞尾酒，好有型呀！

伏特加配甜酒、鮮芒果及石榴汁，酒精含量唔高、果味濃，好鬼少女Feel。

PearlonthePeak（28495123）
地址：山頂道128號山頂凌霄閣1樓2號
座位：餐樓100個、戶外露台30個
面積：300平方米
營業時間：星期日至四及公眾假期（11:30am-12:00mn）
星期五、六及假期前夕（11:30am-1:00am）
平均消費：$200-$600
信用卡：Visa、萬事達、AmericanExpress、JCB及Diners