先達兩大維修舖狂數十大病機

蘋果日報 2002/01/10 00:00


人有病自然要搵醫生睇,如果手機有問題就當然要維修,坊間唔少舖頭都有提供手機維修服務,價錢比原廠平之餘起貨時間亦較短。咁到底近期邊啲手機病發率奇高呢?我哋搵咗先達兩大維修龍頭舖,數下佢哋醫得最多的十大病機。假如閣下咁唔好彩部手機出現類似病症,都知道點樣幫佢「返魂有術」!
記者:宋國榮
攝影:楊錦文
8210煲粥最易壞
8210多人用,所以特別多人要維修,其中爛屏幕或出怪字就最普遍。皆因很多用家都喜歡將手機放在褲袋,容易壓爛屏幕及接觸膠。另外長時間傾電話亦容易導致接觸膠過熱而損壞,遇上這種情況可更換接觸膠而毋須換埋屏幕。
Z5/18人人嫌細聲
SONYZ5/18在維修榜排行第二原因並非甚麼大問題,而是好多用家都覺得聽筒實在太細聲,在嘈雜環境如地鐵內就更不妙,所以更換聽筒便是最可行的解決方法。
T28死機冇接收
T28最常見的毛病是不能開機同沒有接收,兩者都同零件老化有關。皆因用得耐自然容易壞,咁情況下換咗零件就掂,不過價錢唔平,買唔買過部新機就請自行判決。
旅行叉勿用力過度
8210另一個最近常見的毛病就是叉唔到電,其中可能是手機底部的叉電位損壞,皆因大家叉電時唔覺意大力將插頭塞入插孔,日子有功便容易整壞叉電位,所以下次用旅行裝叉電器時記緊輕手一點。
壞機人為因素多
萬里達Jimmy:其實每日都有差不多30個人攞機嚟整,咁多壞機一個可能是用手機方法用得唔好,亦可能係零件老化,至於水貨改中文機後亦好易有軟件問題,但通常手機有小問題拎去原廠整都會話你聽唔使整甚至冇得整,但坊間維修舖就多數幫到你。

(b)萬里達專業維修中心
地址:旺角先達廣場1樓F103號舖
電話:27424606
百利Kent:因為近期新機唔算多同吸引,舊機用得耐又容易壞,所以舊機要維修嘅數目遠比新機多,至於壞機原因多數都係人為,亦有可能係手機生產商質素做得唔好。

(a)百利科技
地址:旺角先達廣場1樓F88號舖
電話:27700027