九一一恐怖襲擊今日一周年，當時事件發生後，美國演藝界非常團結，並自發性發起籌款活動，呼籲國民勇敢向前。
不少荷李活明星對一年前發生的襲擊事件仍然歷歷在目，早前他們發表自己對九一一事件一周年的感想時，其中湯漢斯（TomHanks）感歎世事無常，是次襲擊更令他們改變了人生觀。而拉丁女演員莎瑪希恩（SalmaHayek）表示此事令她對人性感到失望。
荷李活男星夏里遜福（HarrisonFord）和伊莉莎伯凱莉（ElizabethHurley）均異口同聲表示恐怖主義陰霾未散，而凱莉更呼籲所有人應團結一致，對所有人好一點。

莎瑪希恩
（SalmaHayek）：對人性失望
「當日有超過三千人喪失生命，呢件事非常恐怖！我覺得大家應該反思一下，究竟我哋做錯乜嘢？點解呢個世界會變成咁？總之我對人性好失望。」

安東尼奧班達拉斯
（AntonioBanderas）：整月失眠
「九一一當日，我喺洛杉磯屋企望住電視機，成晚都失眠。當我目睹世貿倒塌嘅過程時，我真係目瞪口呆。我以為呢啲事只會喺電影中出現，之後我失眠咗成個月，隨時喊得出。」

馬修培利
（MatthewPerry）：全國團結
「我諗呢件事（九一一）帶來嘅負面事物，實在太多。或者咁諗，美國人長久以來，都未曾真正團結過，今次發生襲擊事件，唯一嘅好處就係全國人都團結起上嚟。」

湯漢斯
（TomHanks）：不再執着
「九一一呢件事，相信要等十幾年先睇到佢嘅真正影響。但我的確變得冇咁執着。不過我相信，要到仔女長大成人後，世界秩序先會更加清晰。」

高蒂韓
（GoldieHawn）：織國旗平復心情
「我當時好驚！我記得冷戰時候一聽到消防車聲，我就立即匿喺桌底，因為我驚會有空襲。九一一當日，我坐喺電視機前，感覺同冷戰時一樣，但我今次冇匿埋，而係用毛線織國旗，平復我嘅不安。

伊莉莎伯凱莉
（ElizabethHurley）：學咗好多嘢
「我慶幸九一一當日能夠喺美國，感受呢個震撼嘅時刻。事實上喺事件發生後，大家都學咗好多嘢，重對其他人都好啲。」