當年今日

地產多聲道:內地客買荃威花園度假用

蘋果日報 2003/08/25 00:00


真係風水輪流轉,國內自由行豪客忽然變成香港低沉樓市嘅救星,當大部份香港人仍然堅持「樓價重會跌,遲吓先買啦!」嘅信念時,見到大陸豪客真金白銀攞幾百萬出嚟支持香港樓市,唔知有乜感受呢?話時話,睇清楚近日國內同胞買嘅貨,都不乏平價筍嘢,好似荃灣荃威花園啱啱錄得廣州客入市個案,造價就比市價平咗七個巴仙。
美聯區域經理何勇方報料,早幾日有一名嚟自廣州嘅自由行買家,喺香港親戚陪同下,去佢地荃灣區嘅分行搵樓,要嚟自用而唔係收租,所以一定要搵平貨,一百萬以下嘅單位就最啱,結果睇咗幾日樓。最後決定用八十三萬,買入荃威花園C座中層一號室,面積六百一十六方呎,呎價一千三百四十七蚊,係同類單位近排嘅平價水位。
該名廣州客係生意人,喺廣州有自置物業,諗住日後會經常嚟香港玩,所以買番層樓作度假用,好過住酒店。至於點解揀荃威?主要係樓價平,實用率又夠高,屋苑環境唔錯等等。

代理風吹雨打搵生意
主打一手盤嘅地產經紀,首要條件就係無懼打風落雨,照樣積極𢱑客,好似噚日三號風球,強風加上大驟雨,唔少人寧願留喺屋企。不過喺將軍澳中心商場出面嘅經紀,就冒雨揸住成叠資料,企喺無遮無擋嘅地盤周圍,問路過嘅人有冇興趣睇樓。相比之下,喺維景灣畔撈生意嘅經紀就輕鬆啲,起碼可以地鐵站外
政府半山車房招租
政府每年都會推出一批露天停車場招租,位置多數喺新界,好似葵青區就特別多,地皮面積最細通常都有萬零呎,大到三四十萬呎嘅都有。
除咗露天停車場外,政府連車房都有得出租,不過地點就喺半山寶雲道十五號對面,只得一千零五十五方呎,夠晒迷你。政府又規定車房只可擺放四部車,租期三年,之後按季續租。呢類地皮,啱晒啲靚車多到冇碇擺嘅闊佬啦。

紀21加強與傳媒溝通
地產代理行經常會發新聞稿畀報館,間中都會同傳媒打交道,但唔係個個代理都知點樣同傳媒溝通,有時蘭西都遇到代理詢問,報館需要啲乜嘢內容至會刊登,或者出席採訪。
世紀21日前就搞咗個座談會,請嚟資深傳媒人,向代理主管同經理講講溝通技巧,足足用咗一個鐘。睇嚟第日世紀21搞活動或者記者會都能迎合傳媒所需。
中記員工做兩棲動物
經過一輪入市熱潮之後,發展商手上樓盤有啲加價,有啲就減優惠,結果成個市場即刻交投放緩。代理當然唔係咁開心啦,聽中原地產講,佢哋專做一手嘅經紀唔多,只有幾十個,冇嗰啲投放較多人手代理行咁傷。
原來中原𠵱家要求經紀做「兩棲動物」,即既要推銷一手,又要兼顧二手,今時今日嘅環境,有得做好過冇得做,兩邊走雖然辛苦啲,但做到生意嘅機會都大啲。

經紀培訓自作自受
香港零售管理協會舉辦「2003香港服務業獎:優質顧客服務」比賽,有份參與嘅美聯物業,就搞咗一系列講座,提升前線員工嘅服務水平,重特登請嚟註冊企業教練,舉辦唔同嘅培訓課程,講解何之謂優質服務。
其中一堂嘅教練都好有心思,玩角色扮演遊戲,由班經紀扮演顧客,親身了解作為顧客向經紀投訴嘅心情,自作自受,以改善工作態度。
蘭西
電郵地址:[email protected]
empty
政府出租位於寶雲道嘅車房,只可擺放四部車。