袁仁祥請食飯，講起《蘋果日報》確係醒，訪問BraTop售貨員Tiffany，影得靚之餘又唔Cheap，效果重好過發掘佢出嚟嗰本雜誌。袁仁祥都話想請佢做Sales，可惜靚女志不在此，如果唔係，拍埋王牌Sales「潛水表」，袁仁祥生意一定爆燈。
祥哥又講裏原宿，總結就係淡靜，因為日本啲正價舖冇乜人排隊，炒舖都唔知賣乜好！𠵱家反而喺香港排隊買正價Nike同MichaelLau，再上網或畀炒舖重着數。
祥哥預計香港搞炒舖，來年有機會大豐收。「𡃁仔排隊買衫褲鞋轉手炒賣已係大氣候。不過有樣嘢要注意，就係炒舖唔可以親自出馬排隊，如果被客認出就大鑊。」
原來早排旺角有間炒舖因為出動太多人排隊掃Nike而俾客人認出，怨聲四起，唔少人重上網聲言杯葛。
「香港咁細，老闆出馬排隊好易認出，唔似日本炒家太多地方太大好難撞見。香港啲客亦小器，朝早見你排隊買五百蚊對鞋，下晝見你擺喺舖賣九百，條氣實唔順，記你一世。日本仔反而認命，排唔到隊就心甘命抵出高價接貨。」所以不妨組織排隊黨，幫炒舖出面搵食都係生意。

主持人：大食Jack
八卦熱線：[email protected]