旅發局主席田北俊近日粉墨登場，亮相內地東方衞視節目《看東方》，拍攝旅遊短片宣傳奧運馬術，身為馬主嘅田少仲入埋馬房，帶同愛駒「新東武士」齊齊上電視。田少自認普通話係有限公司，將賽馬比賽講咗做「晒馬比賽」，連續NG幾次，加上佢又唔多熟馬術運動，所以事前要睇錄影帶做功課。

田少同八方講，養咗4年嘅「新東武士」就快7歲，出賽40幾次只贏過3次1,200米泥地冠軍，總共只贏得360萬元獎金，養馬成本卻花咗佢400幾萬，不過佢話總算拉過頭馬，匹馬唔算蝕本貨。田少話最鍾意嘅愛駒，係第一隻養嘅「快樂武士」（Gaylord），因為隻馬好長氣，所以之後旗下馬匹都以武士命名。富豪養馬唔志在輸贏，田少話最緊要唔好跑包尾，否則影響佢形象就失威。
香港仍然係內地人旅遊熱點，去年內地旅客消費增幅排第一位，為吸引內地客喺奧運期間嚟香港，旅發局預算用1,100萬喺內地宣傳。