2018年就快結束，商台、有線電視、有線寬頻、《星島日報》同埋《英文虎報》，今年再次合辦「2018十大新聞選舉」，畀巿民喺29則重要大事中，選出本港十大新聞。

主辦單位列出29則新聞中，包括「律政司司長鄭若驊為大宅多處僭建道歉」、「政府及中央打擊港獨，取締香港民族黨」、「外國記者會安排陳浩天演講，副主席馬凱被拒續工作簽證」、「旺角騷亂梁天琦暴動及襲警罪成，判監6年」等新聞，現身活動嘅政制及內地事務局局長聶德權，今日就好「政治正確」，揀咗「粵港澳大灣區啟動，特首成為建設領導小組成員」呢一則，話因為同佢工作關係範疇好有關，亦都非常重要，「呢個新聞本身未必好爆，或者引起好大嘅討論，但佢本身係有好大嘅重要性，同對香港長遠發展好重要」。

出席同一場合、一向敢言嘅「男神」王宗堯，就揀咗同聶德權同一則新聞，但就有完全唔同演繹，一上台就搞笑介紹自己係「中國香港大灣區嘅王宗堯」，仲話一定要講吓「中國香港」，笑言：「係要咁講，如果唔係會俾人DQ㗎嘛！」男神另一心水新聞，就係「施政報告倡明日大嶼願景，擬填海1,700公頃造人工島」，話「我哋用1,100億元去起一個人工島出嚟，個島會唔會漂走？會唔會去咗大灣區呢？」

可能聶德權都聽到男神，對上述政策有好多疑問，會後即時捉住男神解畫。男神就向八方透露，聶德權話佢知，大灣區包括香港同好多城巿，「佢（聶德權）話唔係一定要搬晒所有香港人上大陸住喎！」，男神聽完就回應：「我知，我有睇新聞」，覺得局長嘅解釋「無乜用」喎。

至於嚟自鴨脷洲街坊學校嘅小五生吳同學，上台就揀咗「朱經緯於佔旺期間警棍擊途人，判監3個月」呢一則。吳同學話，自己只係一個小學生，無乜政治立場，唔係黃絲亦唔係藍絲，但就覺得朱經緯2014年用一支警棍去打途人係非常唔啱，「雖然有人話喺雨傘運動期間，警方嘅壓力好大，但都唔可以因為咁樣，就去打一個人。就好似我咁，我身為一個風紀，我都有好多一、二年班嘅同學，佢哋啲行為（有時）真係會令到人好激氣，但係我都唔可以因為咁就去打佢哋，老師照樣會罰我哋，仲可能會罰雙倍。所以我覺得呢單新聞畀咗個好重要嘅訊息我哋，我哋知法犯法，無論有幾充份嘅理由，都係唔啱，同埋我覺得身為一個警司，應該要以身作則，做一個好榜樣畀其他人睇」，似乎真係對呢單新聞好熟悉喎。