一直有傳張國榮拍攝電影《異度空間》時，因過份入戲而難以抽離，與他同樣在片中飾演因見鬼需要心理治療的林嘉欣，坦言演繹角色時亦感到焦慮不安，有時更會忽然落淚，故她會以投入新工作及保持單純生活來作平衡。

張國榮與林嘉欣在《異度空間》一片合作，但一直有傳張國榮因演得太投入，無法抽離角色。林嘉欣日前接受本報電話訪問時，坦言拍攝該片時亦受角色影響，情緒變得緊張，簡直有死過又活過的感覺，相當辛苦。

經常無故落淚
嘉欣說：「嗰時我開工，每日都懷疑自己做唔做到。《異度空間》係我第二次拍戲，個角色同我嘅性格分別好大，我做得好辛苦。唔係因為羅志良（導演）同哥哥（張國榮）嘅話，我都做唔到，羅志良畀好多意見我，哥哥就好戲，令我演得好舒服。」
憑拍《見鬼》一片而封后的李心潔，之前亦在訪問中表示因她扮演一個不時見鬼的神經質角色，故令她情緒低落，在鏡頭後也經常落淚，嘉欣對此說：「我完全明白佢嘅感受，嗰時我嚟咗香港幾個月，拍完戲返到屋企，無端端會喊。拍呢部戲，緊張就一定緊張，一定會失眠，食唔落，喊，但辛苦得嚟有快感，好似有死過又活過嘅感覺。」

香港令人迷失
正因為投入角色，所以嘉欣會想辦法尋找自己的平衡點，她說：「有時啲人叫我，我冇應到，唔係我唔應人，係因為我冇留意外面嘅世界，所以快啲投入新工作就會好啲。」
嘉欣又說：「平日我會保持自己嘅生活，好單純，甚至有啲無聊，睇吓書、買花、上網同睇吓戲。香港嘅節奏太快，係一個容易令人迷失嘅地方，我覺得最原始嘅生活可以搵番自己，所以多年嚟我嘅性格同生活習慣都冇變過。」
此外，林嘉欣與盧巧音等正忙於拍攝電影《六樓后座》，他們一直只拍廠景，日前才有機會到尖沙嘴小熊國取景，眾人笑言有如放監般興奮。
採訪：朱芷瑩