為慶祝有線10月份15周年台慶，由肥媽主持嘅節目《肥媽私房菜》就邀請咗賭王何鴻燊同三太陳婉珍做嘉賓，佢哋仲帶埋個仔猷啓同個女超蓮現身，三太又親自下廚煮焗雞畀老公品嚐。

愛電眼美人

賭王大讚三太美貌與智慧並重，佢仲話：「唔係個個為人妻都好似佢咁可以入得廚房，我最鍾意食佢煮嘅鮮魚梳乎厘，我可以一次過食四分一盆，呢味菜係佢喺葡萄牙學嘅正宗葡菜。」賭王仲話三太嘅烹飪天份遺傳咗畀佢兩個女，兩個女都好識煮嘢食，肥媽問賭王覺得點嘅女人最靚，佢話：「女人最緊要識得用一雙眼去電男人。」
賭王又猛讚三太好黐家，肥媽聞言即話：「每次想話約三太飲茶，都唔成事，始終都係去咗佢屋企聚會，一次外出約會都未試過，佢次次都話唔知老公幾時返嚟，想喺屋企等佢。」賭王仲話三太識得管教仔女，三太話：「我從小已教佢哋點樣分辨是非，呢樣最重要。」

家和萬事興

囡囡超蓮話：「我最怕媽咪嬲，佢嬲時唔會打罵我哋，只會唔睬我哋。」賭王稱女兒嘅擇偶條件要好似佢咁有幽默感，仲話「家和萬事興」係佢維繫呢個大家庭和諧氣氛嘅秘訣。