當年今日

求驗客手記:徒弟丟架舒米高緊張

蘋果日報 2002/09/19 00:00


周一晚維拉門將安高文嗰單「漏波入網」事件梗係有排講,其中就有鋼門舒米高出面保住「徒弟仔」,以及有球迷被罰「終身不能再踏足伯明翰主場」兩單料值得提!
查實舒米高可以講係安高文嘅半個師傅,上季舒米高效力維拉時,就過咗唔少料畀安高文;當安高文出醜後,舒米高就即刻聯絡維拉,希望可以安慰吓安仔。舒米高𠵱家同維拉無瓜葛點解咁緊張?我求大俠就覺得可能同面子有關,話晒都係徒弟仔,梗係唔想佢再衰落去繼續丟架。
另外,當日衝落球場走去安高文面前嘲笑佢嘅嗰位球迷,已經被伯明翰宣布永遠唔歡迎佢入場,呢位阿哥咁冇品,又抵罰嘅!

英甲3串4一矢中的
有人話周中嘅賽事戰果難測,尤其係多爆冷戰果嘅英格蘭甲組聯賽,不過都難唔到我哋體育版嘅名家吾中,前日推介嘅「英甲三串四」就中到正,有四十八倍分頭認真和味。就算歐冠盃呢類咁高水準嘅比賽,當日點題為大家推介直播賽事要捧皇馬上盤亦無花假,甚至各名家響擂台嘅推介,亦都一致睇死羅馬輸波。
費爵爺老懵董唔知對邊隊
曼聯領隊費格遜響歐冠盃對以色列球隊海法馬卡比賽前,有記者問佢點睇對手,費Sir就話對方舊年響歐洲賽同AC米蘭及帕爾馬等球隊比賽之後進步不少,吓?嗰隊係特拉維夫夏普爾喎!有記者即刻提醒費Sir搞錯咗,點知費Sir答話已經唔係第一次搞錯呢兩隊!我求大俠聽到呢度就忍唔住笑,究竟係佢個人老懵懂咗吖?抑或曼聯真係咁睇唔起對手呢?

祖記揚言唔賣金童
迪比亞路最近弗到漏,球會當佢係寶,祖雲達斯總監莫治聲言好快會同呢件金童提前續約,同埋話永遠唔會賣走佢。
不過我求大俠奉勸迪比亞路咪咁老定,當年夠無咩人諗到祖記連巴治奧都肯賣喇,佢哋有咩做唔出呀?