全世界都講世界盃，睇世界盃，只有美國人在過去兩星期會留意NBA及NHL決賽，結果兩大決賽都係打咗五場就分出勝負，聖安東尼奧馬刺以四比一輕取邁亞密熱火，洛杉磯帝皇同樣以四比一贏咗紐約流浪，冰上曲棍球左丁山唔多熟，難以評論，籃球就有多啲嘢講嘞。勒邦占士與熱火確實難與米高佐敦嘅芝加哥公牛比較，以後再唔好講占士與佐敦咯，佐敦明顯係高一皮。馬刺嘅鄧肯性格比較內向，唔鍾意演嘢，但呢位踏實球星打到38歲仍然係馬刺嘅穩定力量，唔到你唔服，大概係佢少花fit，基本功夫扎實，勤奮練功，不好主動出鋒頭之故，所以能夠長期維持狀態，對佢嚟講，無論form與class都係permanent（永久），年輕人多數喜歡學占士、拜恩、佐敦呢類大明星，但呢三位係天才，根本冇得學，鄧肯才是凡人所能學到嘅最高標準。
美國人唔睇世界盃，係佢地嘅損失，全球觀眾都睇到實，肥仔K嘅巴西、智利同學在facebook留言，每逢國家隊出賽，佢地就可以放工，奉旨睇波，另一位同學去咗法蘭克福工作，來電郵話世界盃開波時間剛好係歐洲晚上睇電視黃金時段，酒吧場所逼爆，人潮洶湧；弊在我地人在亞洲，開波時間與凌晨睡眠時間相沖，幾慘情。今朝3點有西班牙對智利，明早三點有烏拉圭對英格蘭，都係生死鬥，如果西班牙贏唔到波，幾乎可以提早執包袱，因為今日凌晨十二時澳洲對荷蘭，荷蘭冇理由會輸嘅，如智利與西班牙打和，最後一場分組賽由荷智對碰，兩隊盡派副選上陣，摸和各得一分，已足以置西班牙死地。至於英格蘭與烏拉圭，兩隊各輸一場，今場不勝嘅話，又係提早出局格，必定血拼似打決賽。睇過兩隊嘅第一場，左丁山雖然唔係英隊擁躉，但認為英隊勝算較高，一來烏拉圭即使可派蘇亞雷斯上陣，佢久疏戰陣，未必有水準，二來英隊啲速度曾令意大利吃苦頭，今仗如排陣得宜，出巴克利打左中場，朗尼調回中路嘅話，打全攻型可望上半場攻陷烏拉圭，下半場就換入防守性球員同烏拉圭慢鬥慢，打突擊，有取勝希望㗎，一於買英格蘭。