最近有兩個朋友，都是跟外國人結婚，都差不多這個時候生了孩子，很多人都說，混血BB特別可愛，親身接觸，可能吸收了兩個種族的優點，發覺Mix真給人特別精靈的感覺。近年香港由飲食文化到潮流文化，都是獨沽一味喪玩交叉。最近，又有一個歐亞混血兒「Misto」誕生，取Fusion菜集不同地方之所長，爆出味覺火花。是變不出新點子還是真的大勢所趨？你話呢？

記者：張一豪
攝影：楊錦文、林栢鈞
模特兒：Nellis

東張西望食潮流

「年輕人鍾意新口味，鍾意食飯地方舒服，加埋近年經濟都好好多，所以決定搞一間有特色嘅Fusion食肆。最初諗住做純西餐，但好似唔係好夠特色。」老闆Michael娓娓道來，果然是大勢所趨。餐廳除主打正宗東南亞菜式外，還有西菜提供。「咁啱又識到阿Ken，佢係印尼華僑，好犀利，做咗20幾年廚，東南亞各地菜式佢都好熟，連中菜都做過，可以話集各家所長，決定搵佢幫手。」

東南亞聖手坐鎮

阿Ken來港都差不多十年，之前去過新加坡、台灣，本身又是印尼土生華僑，所以對東南亞菜式瞭如指掌，「馬來西亞當地有華人、印度人、馬來人等，所以馬來西亞菜式有幾個地方嘅影子，有着味道濃郁的醬料，以椰汁、咖喱、沙嗲及辣椒為主，相當惹味。而泰國菜在調味上，取自南洋菜系特色，烹調手法上就同中菜頗多類似，口味上，泰菜突出『酸、辣、香』，以下飯菜式居多。至於越南菜比起泰國、馬來西亞等料理，口味清爽順口得多，而且不油膩，多受到中國、法國及南洋其他國家的影響，重原味，以蒸煮、燒烤、焗燜及凉拌為主，識得運用各地嘅特色，就可以融合多國飲食特色而再創新料理風格。」

歐陸做調味

Ken的拍檔Andy，做西菜亦有20幾年功力，「意大利，南北氣候同地理差別好大。北部鄰近法國，所以受影響有唔少加入乳製品菜式，味道較濃郁但調味較簡單，南部則用大量茄醬、亁番茄、辣椒及橄欖油入饌，味道較豐富。而法國美食的特色在於使用食材豐富，汁多味厚，重視菜餚擺設，滿足視覺，所以我哋除咗做一啲地道菜之外，都會玩吓MixandMatch。」誠然，新意思是要搞的。店名Misto在意大利文正正就是「混合」的意思。這家才於上月開業、外表十分洋化的餐廳，店如其名，充份發揮東西「混合」的特色。
喬寶寶試完也大讚菜式夠晒特別，「唔係好多地方有東南亞加西餐Fusion菜，我一般去嘅餐廳都係西式就係西式，印式就印式，中式就中式，但呢度菜式有好多變化，加埋因為樓上舖，地方夠大，裝修又舒服又靜，又有VIP房可以擁有私人空間，而且有卡拉OK，可以話有得食又有得玩，一班人開Party又好，三五知己一齊嚟食吓嘢，飲吓紅酒都咁正。呢度應該會成為我嘅新歡！」

越式香茅鮮胡椒蝦（前）$188、馬來西亞甘香蟹　$228

蝦本身主要是越式香茅煮法，再加入鮮胡椒等泰國調味，有越南菜的香，泰菜的辣；正宗馬來做法，用馬拉盞加咖喱燜蟹，惹味到手指都啜埋。

燒羊仔扒配意式香草燒汁$188

意式燒法，保持原味，配意大利香料茵陳萵、迷迭香做汁，原汁原味之餘，香料又帶出不同風味。

黑松露菌焗鴿胸伴香草意大利飯$158

黑松露盛產於法國和意大利邊界，這個飯本身就是法、意的混血兒，菌香帶出肉味，意大利飯亦惹味，一出就成為招牌菜。

酸子黃咖喱汁扒銀鱈魚$158

泰國黃咖喱加馬拉酸子，香中帶辣，辣中帶香，香中有甜，甜又帶酸，加銀鱈魚的滑，清得來味道十分豐富。　

泰式香芒鵝肝米卷$128

泰法Fusion，用泰式米紙去包芒果和法式煎香鵝肝，入面加了泰式芒果沙沙汁，中和了鵝肝的油膩。

優惠：即日起至11月8日，每吃滿$200，可獲贈一客價值$38的意式綠茶奶凍；吃滿$400贈兩客，餘此類推。

食客有Say

許小姐「菜式精緻，東南亞菜及西餐都有水準，特別欣賞甜品，同酒店無分別。」

Jason「開業短短時間已來過幾次，地方舒服，下午套餐由$40幾至$60幾，好抵。」

Misto（23113298）
地址：尖沙嘴加連威老道46-48號恆隆銀行大廈1樓
營業時間：12:00nn-3:00pm、6:00pm-12:00mn
座位：120個
人均消費：$120-$250，現金及Visa、萬事達，設加一服務費。