上個禮拜仲喺越南，今日就去湖南嘅財經事務及庫務局局長馬時亨，噚日喺會計師公會周年頒獎及畢業禮舊事重提，講關於重開已經冇咗嘅期貨交易可行性，佢話由於中國情況改變咗，𠵱家提番呢個課題出嚟，係要做多啲研究工作，因為牽涉到交收同貨幣問題。
佢仲話前日李國寶已經提過由中國銀行香港總裁和廣北組織一個小組，特別去研究期貨交易點進一步推行。馬仔又話好有信心香港方面可以好快達致國際水準，反而最緊要係定位，以及做邊方面期貨。
馬仔今日下晝兩點又馬不停蹄飛去武漢，兩三個鐘頭機程就到，即刻會見湖南省領導，之後少不免晚宴洗塵，禮拜五至返港。

會計師公會會長陳茂波亦有出席活動，佢就日前該會攝製嘅一輯出位短片解畫，話會計師嚴肅一面亦有輕鬆嘅一面，都係一個嘗試啫。華華都睇過條片，覺得好開心，無傷大雅，唔需要太保守。
會計師公會專業資格課程喺99年開辦，今年有551名畢業生，係歷來最多人畢業嘅一屆，亦較去年349人多咗58%。由於呢啲畢業生仍須累積三年實際工作經驗先至可以成為會計師，所以佢哋要到09年至可以取得會計師資格。
李華華
LiWaWa@AppleDaily.com