當年今日

來港二十多年日本廚師正宗日本年糕賀新年

蘋果日報 2002/01/01 00:00


今日一月一日是新的一年開始,每年呢日都會同朋友開Party慶祝一番,搵啲新意思搞搞,不如過一個日本新年,而且日本新年都係喺呢一日,就用日本人新年必食的應節食品「年糕」製番幾味。
今次請來日本大廚加滕英雄先生,為大家示範煮幾味日式年糕,煮法重好簡單易學,實行開一個日式年糕Party。
記者:葉少萍
攝影:楊錦文
示範:行政總廚加滕英雄
場地提供:第一食事處日本料理
電話:24988905
地址:觀塘道480號觀塘工業中心第一期地下D

加滕英雄
原籍日本京都,來港擔任廚師已有二十多年,香港有許多日本廚師,也是他的門下學生。
日本年糕
日本年糕以日本糯米製較為普遍,先將糯米蒸熟,然後用木槌舂成糊狀,邊舂重要邊加水,另外日本米、水稻都係製年糕的材料之一,每次製造都會是一人負責舂,一人負責加水,借此發揮一家人的合作精神,使家庭更融合。用鑊煎雖然好味,但必須加油同煮,而油會令年糕味變差,兼太油膩,所以最好都係以細火燒。除了傳統原味外,日本人重鍾意用不同食物,加入年糕中同食,使年糕更多元化。
除了自製年糕(如三色年糕般)之外,亦可選購現成年糕,$45-$80一包(二十多塊),city'super有售。
關東風味年糕湯
年糕除了可燒來食之外,用湯拌食一樣好味,好似呢款以關東製法的年糕湯,以清淡的湯底拌食,令年糕又煙韌又滑溜,配埋多種材料,如日本紅魚蛋、甘笋、冬菇、大葱、地雞同食,夠晒豐富美味。

材料: 1人分量
年糕1件
日本紅魚蛋1片(切條)
甘笋2片(切花)
冬菇1隻(切絲)
地雞(日本雞)40克(切片)
大葱少許(切絲)
三葉(日本香草)1-2棵

製法
用細火將年糕底面燒至變金黃色備用。兩碗水落鑊煮,滾後加入木魚花少許、淡口豉油少許、海帶少許、日本甜酒少許、鹽少許同煮。
滾後加入日本紅魚蛋、甘笋、冬菇、大葱、地雞及三葉煮至滾。湯滾後加入已燒好的年糕滾一滾即可。
傳統風味紫菜年糕
日本人最鍾意用紫菜包住各種食物同食,好似常見的壽司、飯糰,原來連傳統應節年糕,一樣會用紫菜包住同食,因鹹鹹哋的紫菜,能令年糕增加味道。

材料: 1人分量
年糕2件
紫菜2片

製法
用細火將年糕底面燒至半金黃色。在年糕底面塗上日式豉油,燒至底面全部變成金黃色。用紫菜包住年糕同食。
自製三色年糕
呢款三色年糕,有原味、栗子味同日本香草味三種,以傳統製年糕方法製成,原味入口保留了傳統風味,栗子味又甜又可口,香草味就夠晒香。

材料: 1人分量
日本香草20克
熟栗子5粒
日本糯米120克

製法
糯米洗淨加適量水蒸熟,日本香草磨粉,栗子磨碎粉。將部分糯米放進容器內,用木棍舂爛,邊舂邊加水製成黏狀原味年糕。香草年糕製法差不多,用部分糯米邊舂邊加水及香草粉。栗子年糕製法一樣,加入部分糯米邊舂邊加水及栗子粉。將製成的三種年糕,用細火燒至底面金黃色,可蘸豉油、辣醬伴食。
日本香草$15-$20一包(5-7片),city'super有售。
關西風味紅豆年糕
日本關西人喜愛味道香甜,好似呢款紅豆年糕,就係佢哋愛吃的年糕煮法之一,以又甜又腍的紅豆,配香味一流的柚子,伴軟滑的年糕同食,感受一下關西風味的年糕食法。

材料: 2人分量
紅豆50克
年糕1-2件
柚子少許(切絲)
砂糖少許
鹽少許

製法
先將紅豆浸腍,最好浸1日。細火將年糕底面燒至金黃色。煲滾2碗水後加入紅豆,轉慢火煮20分鐘,加入柚子繼續用慢火煮至滾,加年糕、糖及鹽滾一滾即可。