當年今日

701收料站:大華唔使心急上車

蘋果日報 2002/06/04 00:00


昨日經紀陳同小初講,早兩日行街見到大華國際(600)個幕後炒家,同埋一個融資界嘅大哥大一齊傾得好埋。佢開初都以為冇咩特別,以為傾度水之類嘅事,但收尾返公司睇下大華股價,原來相當波動,事件甚為可疑,八卦一番之後,唔排除大華搞緊控股權易手,即係賣殼咁解。
大華股價近排都算古靈精怪,一個月內由10仙鏟到上去14仙水平,噚日朝早隻股重喺10大升幅內,最高見過15.7仙,但就平收14仙,朝早撲入去真係會輸錢。
小初聽完之後,覺得事件冇咩大不了,講真,今時今日炒賣殼概念其實唔多着數,皆因好多時買家都唔會全面收購,就算有得炒,好多時都係等到買家正式完成收購後,露埋面先至有得諗,所以小初勸經紀陳,唔使咁心急。
況且炒股龍頭光通信(603)復牌之後,股價雖然守得住,但噚日又失驚無神停牌,都唔知搞咩,試問炒股氣氛點會好?
慕容小初