數碼影音：SONY搶攻入門市場
影像孖寶升級減價引你買
SONY剛舉行記者發布會，宣布三月底推出多款數碼影像產品，當中包括一眾新型號數碼相機同數碼攝錄機。雖然各款機種在功能上未算有太大突破，不過都加入一堆過往在中階機種才出現之功能，而且賣價比舊型號大為降低，成為新一年搶攻大眾化市場嘅第一步。
記者、攝影：徐影龍
ImageGirl：Tobe
P31全自動影靚相
發布會主角是兩部CyberShotP31同P71，規格差不多，主要係CCD感光元件之分別。較平嘅P31採用二百萬像素CCD，相片最高解像度為1,600×1,200，應付一般用途如網頁、數碼相簿或列印3R相片，已經非常足夠。並將過往使用專用鋰電改為兩粒普通2A電。
鏡頭只得三倍數碼變焦，光圈值亦只提供F2.8，兩部新機都放棄用蔡司鏡頭，只用番SONYLens。值得一讚係具有7×7多點測光功能，就算背光都可有效減低暗位過黑或曝光過度。
DSC-P31基本規格表：
感光元件：210萬CCD
變焦：三倍數碼
ISO：100/200/400（全自動）
最高解像度：1,600×1,200
體積：106(W)×58(H)×39.5(D)mm
重量：173g
抵讚： 賣價有競爭力，幾乎所有功能都全自動，新手玩家影靚相話咁易。
要彈： 欠缺光學變焦、全自動操作欠靈活性亦係缺點所在。
P71加入三倍光學變焦
貴千二蚊的CyberShotP71，同樣採用2A充電池及具有多點測光功能。但拍攝功能同質素更高，除咗係CCD感光元件達到三百萬像素之外（最高解像度為2,048ｘ1,536），亦加入三倍光學變焦鏡頭，體積比P31稍大，配合兩倍數碼變焦，總數達六倍變焦效果，出外旅行拍攝風景會更為方便。
P71在光圈值上亦較P31較為靈活，最大光圈值同樣為F2.8，最細亦可調校至F5.3，用家可按現場環境作出靈活變化，如猛烈陽光底下、拍攝較遠景深等時，收細光圈功能便顯得重要。
DSC-P71基本規格表：
感光元件：330萬CCD
變焦：六倍（三倍光學加兩倍數碼）
ISO：100/200/400（全自動）
最高解像度：2,048×1,536
體積：124.9(W)×58(H)×43.6(D)mm
重量：226g
抵讚： 新機賣價唔算貴，機身設計及相片質素佳。
要彈： 各項功能在同級機中只算標準，未有驚喜。
網絡DV升級改良版
SONY一直將高畫質技術MegaPixelCCD引入旗下系列數碼攝錄機，今次展出之重點產品TRV50E（PAL制式），不但同樣具備155萬像素CCD，而且係首部高級機加入藍芽無線傳輸功能，用家可透過具藍芽功能之手機，作接駁互聯網絡之用，除可將心愛影片傳給親友外，亦具有收發電郵及上網功能，但操作上難免繁複一點。TRV50E就將顯示屏改良為輕觸式屏幕，所有操作及文字輸入，只需用支筆就搞掂，大大簡化操作程序。
其他功能方面，較值得注意係超級紅外線夜攝同彩色慢速快門功能，就算晚間都可清晰拍攝得到，而彩色慢速快門功能等同數碼相機嘅長時間曝光，令夜攝功能都有彩色顯示，不過慢速快門只適宜拍攝靜態景象。
TRV50E基本規格表：
感光元件：155萬像素CCD
水平解像度：530線
鏡頭：蔡司鏡
變焦：120倍（10倍光學加12倍數碼）
顯示屏：3.5"輕觸式
網絡功能：藍芽無線傳輸
抵讚： 高畫質媲美專業級3CCD機種，用藍芽可即時分享影像。
要彈： 香港通街電腦未必需用藍芽傳輸咁大容量之影像檔案，出國旅行或留學可能啱用啲。
同場加映
心愛靚相即影即印
在記者會中同場展示呢部流動式打印機DDP-MP1，體積小巧方便攜帶，令數碼相片可即時列印出嚟。機頂設有屏幕，雖不可即時預覽相片，不過可依編號揀選列印，用家只需插入MemoryStick便可。至於打印原理則為熱昇華，好處係列印成品極似傳統沖印相片，比高品質噴墨打印機有更好效果，不過替換色紙（約$2一張）較貴。