美元在索羅斯拋售下急轉直下，港股投資氣氛亦因而轉趨觀望，恒指收報9059，升9點，成交70億元。不過，噚日主角唔係藍籌而係國企股，據聞有中資熱錢入市炒作，睇嚟消息都幾堅，東方電機（1072）升7%，收報1.38元，再創1年新高；第一拖拉（038）更被推高10.5%，收0.74元。
大陸樓盤爛尾常有聽聞，但估唔到竟然會發生在香港，均來（396）旗下樓盤被銀主接管，但消息並未影響到本地的中小型地產股大幅下滑，就算債台高築的百利保（617）亦只係跌6.17%。雖然事件未必與樓價下滑有直接關係，但阿虎醒起，曾蔭權在護董大會上，論及阿董貢獻之一，是令香港經濟不再集中在地產方面，真係諗起都令人啼笑皆非。
一間公司要多元化發展係好正常，不過在未發展新業務之前，冇一個老闆會先將公司主要業務打殘。香港在未發展出新的經濟龍頭前，核心經濟支柱地產卻被阿董打散。

創科大客業績靚
裕元（551）自從被納入大摩指數及恒指成份股，股價屢創新高，同樣被納入大摩指數成份股的創科（669）亦不甘後人，噚日大升6%，成交亦增至接近1億元。唔知係咪因為股價急升可以帶旺公司業務，有傳聞話創科獲得一個大型企業的OEM重大合約。另外，創科大客之一，美國HomeDepot前晚公布季度業績靚，反映創科的電動工具及戶外電動設備銷情不俗。
太平地氈（146）噚日突然停牌，話有股價敏感消息公布。此舉令人憧憬大股東嘉道理家族可能將其私有化。不過，阿虎擔心呢間依賴向酒店供應地氈嘅公司會發出盈警，或者好似香格里拉（069）取消派息。
阿虎