酒店翻新 - 左丁山

蘋果日報 2007/05/03 00:00


與北京來客在鏞記食飯,原來鏞記四樓裝修完畢約半個月,佈置大有不同,燈光柔和,配上紫紅色椅罩,與傳統燈火光猛嘅廣東式酒家feel好唔同。
北京來客對香港好熟絡,猛話:「蘇豪區乜好似大過從前,多咗好多新餐廳,蘇豪啲舖租唔貴咩?」一時之間,難以解釋,只能夠以一雞死,一雞鳴答之。北京來客又彈文華東方重新裝修之後,令遊客失望。點解呀,文華東方酒店好似用成十億銀重新裝修噃,北京來客話:「我好鍾意以前舊文華散發出一股colonial嘅環境氣氛,有懷舊感覺。現在呢,啲房間冇晒殖民地情懷。但又唔係好modern,兩面不討好,令我唔想再住。」新嘅置地文華又點呀?北京來客話:「呢間我反為好鍾意,房間佈置夠晒現代化,明顯係新一代嘅。」
做酒店原來唔易,舊文華經四十年風雨,以為適應二十一世紀,重新裝修,點知啲舊客竟然唔領情。呢,彌敦道美麗華酒店會開始大裝修,大變身嘞,將來睇吓啲客人鍾唔鍾意。翻新計劃由李家誠公子親自主持,只許成功,不許失敗,第一炮就係要將頂樓宴會廳搞到豪華瑰麗,勝過洲際酒店宴會廳喎!面積就夠大嘞,可擺八十圍酒,不過大廳係L形,絕唔係一眼睇晒,幾考室內設計師工夫。
美麗華現在係四星酒店,生意好到極,全部翻修後,定位為超級豪華六星級,野心甚大,如果執行得宜,應該有希望成為彌敦道第一大酒店嘅,趁凱悅酒店拆咗,完全冇對手吖嘛。講起凱悅,拆咗真係可惜,冇咗Hugo西餐之外,以前去文化中心聽音樂、睇話劇,自地鐵站走上嚟立即到凱悅中餐廳食輕便晚餐,有粥粉麵,簡直冇得彈,𠵱家冇咗,去喜來登或九龍酒店都冇咁過癮。冇法啦,業主話做寫字樓收租好過做酒店,一於拆之哉,好彩半島酒店業主大老闆係嘉道理家族,佢哋應該唔會拆咗呢間最古老,最有殖民地色彩嘅酒店嘅。