當年今日

  李敬志講祥華村村名典故 - 李八方

蘋果日報 2002/09/14 00:00


喺房屋署做咗三十四年嘅物業管理總監李敬志下周一退休,原來做咗咁多年,佢最懷念九十年代做嘅「游說」三人組──專責游說委員、居民支持政策,應付傳媒查詢。當時房署要搞富戶政策,居民同房屋團體「嬲到拆天」,日日有請願唔在講,居民衝入房委會大樓通宵靜坐、同保安對峙等場面時有上演,結果都能夠化險為夷。八方忽發奇想,如果呢個三人組𠵱家重未解散,睇怕財經事務及庫務局局長馬時亨應該重金禮聘佢哋,避免搞出連場鬧劇。
李敬志又講佢幫粉嶺祥華邨改名嘅舊事,原來條邨嘅位置係喺大埔公路黃崗山,有人建議改名為黃崗邨,但被人鬧話感覺好似黃花崗烈士紀念碑,真係大吉利是!當時嘅房屋司廖本懷就建議抄街尾比較出名嘅「藏霞精舍」,叫做藏霞邨,不過,李敬志驚住小朋友要默屋企地址時會寫餐懵,所以諗咗個諧音,就係𠵱家嘅祥華邨嘞。



傳真︰2623-9278
電郵︰[email protected]