常言道人貴自知，過去兩個星期，大家嘅焦點都放喺政改方案能否夠票喺立法會通過，屬於民主及保守兩大陣營嘅唔同背景人士，包括前高官在內都紛紛「發功」表態，陳四萬同許老爺嘅記者招待會亦將整個「攻防戰」推至高潮。不過，其間有啲唔夠班嘅亦想學人抽水，至「頂癮」嘅要數前民政署副署長呂孝端。
講真，一般市民應該唔係好知呂先生係乜水，但在AO堆中佢無人不識。佢係講：「Everything（is）undercontrol」嘅藍鴻震嘅愛將。此君能在退休前官拜副署長，本進士概括地引一政治劇名句：「Atriumphofmiddling,anodtomediocrity」意即平庸者亦有出頭時。連佢都係副署長，AO們都大喊一句：「Itispossible」！

AO避之則吉

遇有人「有幸」與呂君共事，AO們嘅忠告係對佢主持嘅會議「可避則避」。因佢自以為係「新界字典」，新界事務無所不知，每次開會，無論議題係乜，佢都會「腦筋急轉彎」，將會議變成「新界典故18講」，浪費時間。日前，呢個「蛋撻頭」又學人「挺」政改方案，接受一份報章訪問，內容主要係撐政府嘅委任制度，當中佢提及港英時代政府利用委任制度將基層人士如巴士站站長及啤酒公司公關主任委任入立法局，佢話係議會民主化嘅第一步！
之後，佢又話專業人士多不願選區議會，所以保留區議會委任議席能補充民選嘅「不足」。嘩，本進士真係服咗佢，對佢嘅敬佩有如滔滔江水連綿不絕，又有如黃河氾濫一發不可收拾！大佬，政治發展都冇清晰路線圖，畀我都唔選啦！
有人話香港未ready有普選，上次立法會選舉呂君以「貴為」新世紀論壇新界西總幹事身份參選「勇奪」4000多票，本進士覺得證明咗香港人ready囉。
如果四萬爭普選係「一枝紅杏出牆來」，咁呂君撐委任應該係「一條儍仔彈出來」，許崇德則係「一條茂李亂咁來」，曾憲梓就係「一條老土金利來」嘞！