中原地產收購利嘉閣之後，施老闆（圖右）變成一個人戴兩頂帽，身份較特殊，所以施老闆決定嚟個大改組，自己出任中原集團主席，旗下直屬就有中原地產、利嘉閣同中原（中國）。
董事陳永傑同張奕威就再升一級做執行董事，陳永傑負責成個住宅部，下面就係四大天王，4個營業董事為掌管香港嘅唐秉正、九龍嘅劉瑛琳、新界東嘅阮錫章同新界西嘅王浩聰。至於張奕威就負責番佢嘅強項中原地圖同網頁等。工商部就由陳雁樓出任董事。
珀麗灣雖然重未開賣，但係聲勢就愈來愈強勁。噚日輪到中原搞個名為「全身感受珀麗灣」嘅推介會，租用尖沙嘴新世界中心裏面新開嘅NewEra兩粒鐘搞呢個活動，重由兩主區區頭做司儀，以輕鬆幽默方式介紹珀麗灣幻燈片，場內重有亞熱帶女郎派玫瑰花同埋薰衣草紀念品，緊貼該盤設有Spa水療服務，搞到個個想即刻實地睇呢個盤，果真搞得有聲有色。

向雷霆笠高帽
嘉賓雷霆準時到場，中原施老闆重喺台上大讚呢位喺金融風暴後賣樓戰無不勝嘅樓神，重用「新地出品、雷生帶軍、必屬佳品」嚟形容呢個盤，搞到雷生鬼咁開心，重暗示會用「高佣政策」回報班代理，咁大鼓勵，成班代理自然「訓身演出」啦！
地產代理話題都離唔開珀麗灣，美記黃主席話已經向新地雷霆洽商珀麗灣做員工度假屋，但重未決定係租定係買。繼美記日前帶隊從海上睇珀麗灣之後，香港置業噚日亦由董事胡日發帶隊去睇珀麗灣，同行嘅前線員工有400個，港置計劃派出8成以上兵力去打好珀麗灣呢一場硬仗。
蘭西
電郵地址：[email protected]