一雙繡住名字嘅名牌皮鞋，成為寶哥哥偷情秘史嘅證物，全城掩住嘴笑，但好多人唔係好明：點解對鞋會有個名嘅？哈，呢個就係所謂上流社會名人同一般平民嘅分別嘞！
八方知道，好多城中嘅名流都鍾意喺自己嘅帽、衫、鞋或者領呔繡上大名，以示身份尊貴，我有人冇。
中環有間店舖就專門為名人衣物繡刻姓名，生意好興隆，城中好多頂級名人都幫襯佢，有啲特別嘅鞋同衣物重要專登運返外國原廠去做，有時整一對鞋嘅收費閒閒地多過窮等人家一個月人工！
香港地有句話叫「先敬羅衣後敬人」，但喺名流世界唔單止咁，而係「先敬鞋後敬羅衣」。
城中首富李超人對呢樣嘢就好有心得，八方記得佢有次私下同傳媒傾偈，就曾經教記者點樣去分辨乜嘢係「真正嘅名人」，佢話去波場睇真正嘅名人，唔係睇佢哋着乜嘢華麗晚禮服，最緊要係睇佢哋着乜嘢鞋！因為好多名人名媛都肯花十零二十萬去外國訂做靚衫，但就往往忽略咗對鞋，結果觀音頭掃把腳。
超人話，就算大家都着名牌鞋，但係「真正嘅名人」一眼就可以睇出邊對鞋嘅皮料先至最好最上乘，邊對只係次貨嘢，呃唔倒人嘅，所以話，對鞋先至係最重要嘅！
八方覺得更重要係，對鞋唔好亂咁擺。


E-mail：[email protected]