當年今日

水貨舖執笠大預言

蘋果日報 2002/01/30 00:00


高佬丹尼年幾前被裁員,成半年都搵唔到嘢做,膽粗粗學人走美國同日本衫水貨,總算食到裏原宿水貨熱潮尾,兩三餐有着落。不過今個月又嗌晒救命,唔知點解今年1月全行零售都係靜到暈。丹尼同行內人八開,睇怕今年應有唔少水貨店執笠,尤其走衫同波鞋嘅行家,一來競爭大,二來入貨渠道唔再係秘密。丹尼話早排「營養白汁」周刊帶讀者過日本掃貨,炒舖正貨舖都去勻,連好多只有行內人先識得去嘅舖頭都殺埋,唔少客人從此知道以後唔使幫襯水貨店,有啲客重口響響可順勢入貨做埋老闆,丹尼話有乜辦法唔心淡?!
丹尼睇行內最終只剩番兩三個可繼續生存,首推當然係呢行鼻祖,有水貨大亨之稱嘅利時D,重有先達陳果、同兆萬美少年堂堂主都係可靠老字號搵到食。至於銅鑼灣銀座MC太子預計可靠家底捱過難關,丹尼話全行都知太子兩公婆賣裏原宿水貨只為興趣,佢哋試過就算唔得閒過日本入貨,都要幫番本地水貨舖以門面價接貨,再以原價甚至減價賣畀客,但求自己間舖啲貨夠新唔可以遲,終於益晒啲客。
丹尼又話銅鑼灣最近有間水貨舖成日被投訴,客人懷疑舖面啲貨全被老闆食咗頭啖湯,着完去威先掛出嚟賣,你知中國人好着重「完璧」呢個傳統,被人摸過都好棹忌,唔同啲鬼佬或日本仔接受能力咁高。𠵱家連帶其他舖都受影響,客人買衫前都問清楚件貨有冇着過,如果有就算減價都未必買。丹尼話,係時候諗第二樣搞作嘞。

主持人:大食Jack
八卦熱報:[email protected]