當年今日

  超人23萬聽一支歌 - 李八方

蘋果日報 2002/05/30 08:00


超人李嘉誠旗下嘅長江實業噚日同滙豐銀行一齊開記者會,宣布為買長江樓者提供九成按揭,呢類合作本來冇乜特別,八方諗住得閒至上去八一八,點知都有收穫,真係服咗超人班夥計,咁都諗到噱頭爭取曝光。
話說講講吓賣樓,忽然嚟一個捐款儀式,由長江董事趙國雄送一張二十三萬元支票畀公益金,原來係贊助滙豐銀行主席艾爾敦上個禮拜喺公益金周年籌款晚會中高歌一曲。

艾爾敦自資出唱片
八方識得嘅銀行大班中,論唱功,艾爾敦認第二,冇邊個敢認第一;佢除咗年年喺高級職員聚會中登台表演之外,重自己出唱片,甚至唱埋歌劇。有一次大班去商會演講,刻意將一批歌名穿插在演詞之內;問佢香港人近來咁灰,應該唱乜歌去振奮人心呢?大班馬上話:UpWhereWeBelong啦!即係電影《衝上雲霄》主題曲。今次幫公益金籌款,艾爾敦同郭秀雲合唱,揀咗首《IslandsInTheStream》,老婆負責和唱。
至於超人,咁多年捐錢捐咗四十五億,長江又賺到笑,二十三萬濕濕碎啦!公益金主席陳祖澤應該搵多幾個大班唱歌,就唔使削減資助機構撥款啦!


傳真︰2623-9278
電郵︰[email protected]