「打完風，當堂清爽晒！」一個戴住類似船長帽亦都着住套類似船長衫、留住二撇雞蝦餃鬚嘅中年型男，一邊行出一個燈塔，一邊戙起隻腳喺石頭上面，一邊講出呢句話。講完之後喺衫袋掹出一包沙龍然後點着煙，深深吸一口。
以上係一個細個時候喺電視上睇到嘅沙龍煙仔廣告。記憶咁深就係因為嗰句：「打完風，當堂清爽晒！」打風當然可怕，但香港算係好彩，通常打風嘅破壞力都唔算太大，最令人懊惱嘅反而係打風前嘅嗰種「悶」、「𣲷」、「鬱」、「濕」、「結」，就好似處身喺一個恒溫但靜止嘅濕蒸桑拿房內一樣，周身黐住晒，郁吓都覺辛苦。
香港嘅夏天唔知係咪撞鬼，抑或齋係因為人口過度稠密、空氣過份污染，差唔多整個六月頭至八月底，香港都係維持住呢種咁曖昧嘅悶熱，好似一個漫長嘅打風前日子一樣，除非唔離開冷氣，否則個身唔會乾爽。
到了九月，偶爾吃完晚飯行出街，門一推開，竟然冇咗嗰種推開濕蒸房門嘅感覺，雖然未到清，但已有了點爽意，秋天應該快到了，難熬的日子快點走吧！
香港其實也正處於一個看不到岸的悶熱期，一切是那麼的「悶」、「𣲷」、「鬱」、「濕」、「結」，能否從哪裏借來一場風，風散後，不只是清爽晒，還要是當堂情爽晒。
循序漸進地當然好，但我是香港人，我更愛當堂。