當年今日

經濟學家護世貿 - 左丁山

蘋果日報 2005/12/24 00:00


講開反世貿,有讀者鬧左丁山,亦有讀者捧場支持,左丁山相信,只要大家對經濟學、國際貿易理論知多啲,就會多啲理解世貿組織及國際貿易如何促進各國嘅經濟增長,有助「滅貧」或「減貧」,用社會福利政策嚟支持、補貼任何一個經濟羣體,例如農民,長期作用一定係令貧窮長期化,津貼費用只會愈來愈大,唔會減少。最得益嘅係邊一類人?就係負責管理、派發津貼嘅官僚及社會組織!
一位讀者Michael來電郵云:「『有線』『世貿特輯』(其實係『反世貿特輯』)由『休娛大腳板』主持負責,請來三位嘉賓,包括反世貿聯盟人士,傳理系教授,中文系教授,講世貿係講自由貿易經濟課題,起碼要搵個經濟學導師,提吓比較優勢,保護主義,津貼資助等問題,唔好當觀眾連經濟101都未讀過。」
左丁山冇睇過呢個節目,無以置評,但前日收到一封電郵,上有好多大學經濟學教授,經濟分析師名字。一位著名經濟分析師話:「世貿會議在港召開,暴露了香港傳媒及不少市民對經濟學的知識缺乏,亦不明白南韓經濟發展情況;香港是自由貿易城市,經濟命脈賴此維持,怎可能否定自由貿易,竟然同情南韓農民而否定自己?這是香港經濟學教育的失敗!」(原文為好長嘅英文,左丁山濃縮之),呢位經濟師呼籲全港大學經濟學教授寫文章,捍衞自由貿易,闡述世貿,唔好俾啲政治佬、社會佬、文化佬係咁噏,經濟佬應份出聲!
左丁山睇完電郵,覺得深得我心,第二日就見到中大經濟研究所主任宋恩榮教授喺明報(十二月二十二日)發表一篇「評『世貿對發展中國家弊大於利』的種種謬論」,時間啱啱好,如果多幾位經濟學教授執筆為文,澄清對自由貿易嘅誤解,咁就更加熱鬧。報紙專欄之中,左丁山算係肯做爛頭蟀,至怕勢孤力弱,雙拳難敵四手啫,有專家教授助陣,咁就膽壯啲。