巴塞隆拿今季成績唔掂，最近先後喺歐聯同埋西班牙盃出局，西甲爭標亦唔樂觀，睇怕都係三大皆空。據講球會方面打算喺季後進行改革，只會留低美斯同尼馬等6個核心球員，其他好似法比加斯佢哋，只要有啱嘅價錢全部可以走，再收購至少5個星級新兵，其中一個目標係阿仙奴嘅奧斯爾，咁會唔會將法比仔踢番去兵工廠，再收購呢位德國國腳呢？
一旦巴塞隆拿喺西甲衞冕失敗，咁今季無疑真係徹底失敗。好彩嘅係國際足協早兩日宣佈將巴塞嘅球員收購禁令緩刑執行，巴塞可以喺今夏買新兵執靚隊波，下季再戰江湖。據西班牙《每日體育報》報道，巴塞球會只係將美斯、尼馬、恩尼斯達、碧基、布斯基斯同埋佐迪艾巴列為非賣品。

想搵大眼仔派牌

門將域陀華迪斯、賓度、丹尼爾同埋桑治等都先後確定或盛傳會喺季後走人，至於法比加斯、馬斯真蘭奴、阿歷斯山齊士同埋柏度洛迪古斯，巴塞嘅態度係唔堅持留人，即係只要有啱價嘅話，就會賣走佢。
巴塞陣容要大執，今夏要喺5個位置上收購新球員，包括門將、中堅、右後衞、中場同埋前鋒。由於34歲嘅沙維已經明顯走下坡，據講巴塞急於物色新嘅派牌球員主力接班，睇中嘅目標喺曾經效力過死對頭皇馬嘅奧斯爾。呢位德國中場喺今季由皇馬加盟阿仙奴，起初表現非常醒神，但之後越踢越沉，我求驗客估佢喺倫敦都唔係過得咁開心。奧斯爾喺西甲證明過自己實力，適應上絕對冇問題，但聽講巴塞方面只係打算開價3,000萬歐元斟介，比起阿仙奴上年由皇馬收購嘅轉會費5,100萬歐元少一大截，雲格真係睬你都傻。之不過如果巴塞加埋法比仔做交易籌碼，或者又唔同講法。

維蘭路華告急再入院

巴塞要留美斯自然要付出，據《馬卡報》講球會會喺未來幾日內落實同美斯續約事宜，將佢嘅稅後年薪由𠵱家嘅1,600萬歐元加到2,000萬，超越皇馬嘅C朗。另外佢哋亦有一個唔係幾好嘅消息，因咽喉癌喺上季後冇辦法繼續執教嘅維蘭路華，日前病情惡化入咗醫院治療，情況唔係咁樂觀。